என் மகனுக்கு வெளிநாட்டில் வேலை. கடன் வாங்கி இந்தியாவில் வீடு கட்டியுள்ளோம். நகருக்கு வெளியில் உள்ளதால் யாரும் குடிவரவில்லை. பூட்டி வைத்துள்ளோம். கடன் அடையவும், வீடு முறையாகப் பயன்படுத்தப்படவும் பரிகாரம் கூறவேண்டும்.

உங்களுக்கு மட்டுமல்லாமல், பலருக்கும் பொதுவாகவும் நான் பதில் சொல்ல விரும்புகிறேன். உங்கள் மூதாதையர் ஆராதனை செய்த சொந்த கிராம தெய்வம் மற்றும் குலதெய்வத்திற்கு சம்பிரதாய வழிபாடுகளை செய்கிறீர்களா என்று தெரியவில்லை.

அல்லது ஏதாவது நேர்ந்து கொண்டு நிறைவேற்றவில்லையோ என்றும் தெரியவில்லை. நம் வேதங்கள், பூர்வ புண்ணியம் என்று விஷயத்தை வலியுறுத்தி சொல்கின்றன.

இப்போது நிறைய பேர் எங்கேயோ நன்றாக சம்பாதித்து சௌக்கியமாக இருப்பதற்குக் காரணம், நம் முன்னோர்கள் குல தெய்வத்தை ஆராதனை செய்ததே ஆகும்.

அவர்கள், ‘என் வம்சத்தைக் காத்தருள்வாயே’ என்று அந்த தெய்வத்திடம் வேண்டியிருப்பார்கள். அதுவே நாம் நன்றாக இருப்பதற்கு உதவி செய்யும். ஆகவே, எந்த ஊருக்கு சென்றாலும் சொந்த ஊர் தெய்வத்தை மறக்காதீர்கள்.

அந்த தெய்வம், ‘என் பையன் என்னைப் பார்க்க வருவானா’ என்கிற தாய் ஏக்கத்துடன் காத்திருக்கும். அந்த ஏக்கத்தை ஒருமுறையாவது தீர்க்க வேண்டியது நம் கடமை. நீங்கள், இப்போது கட்டியிருக்கும் வீட்டில் கணபதி ஹோமம் செய்யுங்கள்.

செவ்வாய்க்கிழமைகளில் கீழ்க்காணும் துர்க்கா ஸ்லோகத்தை 108 முறை சொல்லி, செவ்வரளிப் பூக்களை அர்ச்சகரிடம் கொடுத்து துர்க்கைக்கு சஹஸ்ரநாம அர்ச்சனை செய்யச் சொல்லுங்கள்.

இதுபோன்று 9 வாரம் செய்து வாருங்கள். உங்கள் விருப்பம் நிறைவேறும்.

கட்க சூல கதாதீனி யாநி சாஸ்த்ராணீ தேம்பிகே
கரபல்லவ ஸங்கீனி
தைரஸ்மான் ரக்ஷ ஸர்வத: