ஜிம்' போக ஆசையா?

உடலை ஆரோக்கியமாகவும், கட்டுக்கோப்பாகவும் வைத்துக்கொள்ள வேண்டும் என்று `ஜிம்'முக்கு ஓடுகிறவர்கள் உண்டு. ஆனால் உடற்பயிற்சிக் கூடத்துக்குத் தினமும் தவறாமல் போவது மட்டும் அதிசயத்தை நிகழ்த்தி விடாது. எல்லா விஷயங்களையும் போல உடற்பயிற்சிக்கும் சில விதிகளும், முறைகளும் இருக்கின்றன.

அவற்றைச் சரியாகப் பின்பற்றவில்லை என்றால் உரிய பலனிருக்காது. சில நேரங்களில் பாதிப்பும் ஏற்படக்கூடும். `ஜிம்'மில் ஏற்படக்கூடிய பொதுவான பாதிப்புகள் குறித்து உடல்தகுதி நிபுணர் அல்தியா ஷா விளக்குகிறார்...

அனைத்துப் பயிற்சிகளும் அதிகபட்ச பலனைத் தரும்படி குறிப்பிட்ட முறையில் அமைக்கப்பட்டிருக்கின்றன. ஒருவர் தனது திறனுக்கு ஏற்ப, உடற்பயிற்சிகளிலேயே கடைசியாக அதிகபட்ச எடையைத் தூக்குவது அதிகமான பலனைத் தரும்.

ஆனால் சரியான முறையில் எடை தூக்க வேண்டும். இல்லாவிட்டால் அது வீணாகப் போகும். பலனேதும் இருக்காது. உங்கள் தசைகள் தாங்கக்கூடிய அளவை விட அதிகமான எடையைத் தூக்காதீர்கள். படிப்படியாக எடையை அதிகரிப்பது தசை பலத்தைக் கூட்டுவதற்கான நல்ல வழியாகும்.

அத்துடன், நீங்கள் ஒருவருக்கு எடை தூக்க உதவும்போது, எடை தூக்குபவருக்கு இடையூறாக இல்லாமல் உங்கள் உடம்பை விலக்கி வைத்துக்கொள்ளுங்கள். அதன்மூலம், எடை தூக்குபவருக்குக் காயம் ஏதும் ஏற்படாமலும் தவிர்க்கலாம்.

ஒரு `ஜிம்' உபகரணத்தைப் பயன்படுத்தும் முன்பும், பயன்படுத்திய பின்பும் அதை ஒரு துண்டால் நன்றாகத் துடைத்து விடுங்கள். அதன்மூலம், தொற்று வியாதியால் பாதிக்கப்படாமலும், அது பரவாமலும் தவிர்க்கலாம். உடற்பயிற்சிக்கூட நடத்தை விதிகளின்படி உடற்பயிற்சி உபகரணங்களை சுத்தமாக வைத்திருப்பது வலியுறுத்தப்படுகிறது.

குறிப்பாக, இதயத் தசைக்கு வலுவூட்டும் எந்திரங்களை பயன்படுத்தும்போது! அம்மாதிரி வலியுறுத்தப்பட்டாலும், இல்லாவிட்டாலும் உங்கள் ஆரோக்கியத்தில் நீங்கள் கவனமாக இருப்பது நல்லது. பக்கத்தில் உள்ள உபகரணங்களில் இருந்து கூட, நீங்கள் பயன்படுத்தப் போகும் கருவிக்கு கிருமிகள் பரவக் கூடும் என்பதால், துடைத்துவிட்டுப் பயன்படுத்துவதே நல்லது.

நேரடி சூரிய வெளிச்சம் இல்லாத, மூடப்பட்ட பகுதிகள், கிருமிகள் பெருகுவதற்கு ஏற்ற சூழலாக அமைகின்றன. எனவே எப்போதும் காலணி அணிந்தே பயிற்சி செய்யுங்கள். அதன்மூலம் `அத்லெட்ஸ் பூட்' என்ற பாதிப்பு ஏற்படுவதைத் தவிர்க்கலாம். இந்தப் பூஞ்சைத் தொற்றால் கால் விரல்களுக்கு இடையே அரிப்புடன் கூடிய செதில்களும், கொப்புளங்களும் ஏற்படும்.

காலணி அணிவது, `ஜிம்'மின் வழுவழுப்பான தரையில் வழுக்கி விழுவதையும் தடுக்கும். அடிக்கடி பொது நீச்சல் குளத்தில் குளிப்பவர்களுக்கு `டெர்மட்டிடிஸ்' என்ற தோல் நோய் ஏற்படும் அபாயம் இருக்கிறது. நீச்சல் குளங்களில் கலக்கப்படும் குளோரின் பெரும்பாலான கிருமிகளைக் கொன்றுவிடும்.

ஆனால் குளோரின் அளவு போதுமானதாக இல்லாவிட்டால் உங்களுக்கு மயிர்க்கால் தொற்று ஏற்படும். அதற்கு எதிர்உயிரி சிகிச்சை அவசியமாகும். உடற்பயிற்சிக்குத்தான் உடற்பயிற்சிக் கூடம். எனவே அங்கே அதில் மட்டும் கவனமாக இருங்கள். `ஜிம்'மில் போய் `எஸ்.எம்.எஸ்.' அனுப்புவதும், அரட்டையடிப்பதும் உங்கள் நேரத்தை மட்டும் வீணாக்குவதில்லை. காயமடையும் அபாயத்தையும் ஏற்படுத்துகிறது.

எந்த உபகரணத்தையும் பயன்படுத்தும் முன் அதில் `நட்டு'கள், `ஸ்க்ரூ'க்கள் எதுவும் `லூசாக' இருக்கிறதா என்று பார்த்துக் கொள்ளுங்கள். எந்திரம் `கடகட'வென்று ஆடினாலோ, அசைவுகள் அதிகமாக இருந்தாலோ `ஜிம்' நிர்வாகியிடம் தெரிவித்து விட்டு, வேறு உபகரணத்துக்கு மாறிக்கொள்ளுங்கள்.