சொன்னா புரியாதுக்காக இந்தியில் பாடினார் சிவா

சிவா, வசுந்தரா நடிக்கும் படம், ‘சொன்னா புரியாது’. இந்தப் படத்தில் இந்தி பாடல் ஒன்று இடம்பெறுகிறது. இதை சிவா பாடியுள்ளார். இதுபற்றி படத்தின் இயக்குனர் கிருஷ்ணன் ஜெயராஜ் கூறியதாவது: ‘தமிழ் படம்’ படத்தில் சி.எஸ்.அமுதனிடம் உதவி இயக்குனராகப் பணியாற்றினேன். இந்தப் படம் மூலம் இயக்குனர் ஆகிறேன். இது முழுக்க முழுக்க காமெடியை மட்டுமே மனதில் வைத்து உருவாக்கப்பட்டுள்ளது. இருந்தாலும் தெளிவான கதையும் இருக்கும்.

காமெடிக்காக துண்டு துண்டாக எதையும் சேர்க்காமல் கதையோடு சேர்ந்த காமெடி படமாக உருவாக்கி உள்ளோம். ரொமான்டிக் காமெடி படமான இதில் ஹீரோயின் வசுந்தராவும் ஹீரோவுக்கு இணையான வேடத்தில் நடித்துள்ளார். அதாவது காமெடியிலும் கலக்கி உள்ளார். படத்தின் கதையை நேரடியாகச் சொன்னால் புரியாது என்பதால் இப்படித் தலைப்பு வைத்தோம். படத்தில் ஜாலியாக இந்தி பாடல் ஒன்று இடம்பெறுகிறது. இந்த பாடலை சிவா பாடியுள்ளார். படத்தின் ஹைலைட்டான விஷயங்களில் இந்தப் பாடலும் இருக்கும்.
இவ்வாறு கிருஷ்ணன் ஜெயராஜ் கூறினார்.