பண்ணாரியம்மன் கோவில் குண்டம் விழா: மறுபூஜையுடன் நிறைவு

ஈரோடு மாவட்டம் சத்தியமங்கலம் அருகே உள்ள புகழ்மிக்க பண்ணாரியம்மன் கோவில் குண்டம் விழா சிறப்பாக நடந்து வந்தது. கடந்த 26-ந்தேதி நடந்த குண்டம் இறங்கும் நிகழ்ச்சியில் சுமார் 1 லட்சம் பக்தர்கள் கலந்து கொண்டு தீ மிதித்தனர். தொடர்ந்து பல்வேறு நிகழ்ச்சிகள் நடந்து வந்தது.

மாவிளக்கு நிகழ்ச்சி, புஷ்பரத நிகழ்ச்சி, பக்தர்களுக்கு அன்னதானம் வழங்குதல் போன்ற நிகழ்ச்சிகள் நடந்தது. குண்டம் இறங்கும் நிகழ்ச்சி முடிந்தாலும் தினமும் பல்வேறு ஊர்களிலிருந்து ஆயிரக்கணக்கான பக்தர்கள் பண்ணாரியம்மன் கோவிலுக்கு வந்து அம்மனை வழிபட்டு சென்றனர்.

நேற்று குண்டம் விழாவின் நிறைவு நிகழ்ச்சியான மறுபூஜை விழா நடந்தது. இதிலும் தமிழ்நாடு மற்றும் கர்நாடக மாநிலத்திலிமிருந்து ஏராளமான பக்தர்கள் வந்து கலந்து கொண்டனர். சுமார் 1 லட்சத்துக்கும் மேற்பட்ட பக்தர்கள் வந்திருந்தனர்.

பக்தர்களுக்கு வசதியாக சிறப்பு பஸ்களும் இயக்கப்பட்டிருந்தன. 1 லட்சத்துக்கும் மேற்பட்ட பக்தர்கள் கலந்து கொண்டதையொட்டி மாவட்ட போலீஸ் சூப்பிரண்டு பொன்னி உத்தரவின் பேரில் 1000-க்கும் மேற்பட்ட போலீசார் பாதுகாப்பு பணியில் ஈடுபட்டனர்.