ஆஸ்பத்திரி ஊழியர்கள் 24 பேருக்கு சம்பளம் பாக்கி: பவர்ஸ்டார் சீனிவாசன்- மனைவி மீது போலீசில் புகார்

காமெடி நடிகர் பவர் ஸ்டார் சீனிவாசன் மற்றும் அவரது மனைவி துருவியாவிற்கு சொந்தமான 2 ஆஸ்பத்திரி திருமங்கலத்தில் உள்ளது. இதில் டாக்டர்கள் உள்பட 24 பேர் வேலை பார்த்து வருகின்றனர். அவர்களுக்கு கடந்த 3 மாதமாக சம்பளம் வழங்கப்படவில்லை.

இதுபற்றி நிர்வாகத்திடம் கேட்டும் சரியான பதில் கூறவில்லை என்று தெரிகிறது. இன்று காலை 24 பேரும் திருமங்கலம் உதவி கமிஷனர் கலிதீர்த்தனிடம் புகார் மனு அளித்தனர். அதில் கூறியிருப்பதாவது:-

எங்களுக்கு 3 மாதமாக ஆஸ்பத்திரி நிர்வாகம் சம்பளம் வழங்கவில்லை. இதனால் கஷ்டத்தில் உள்ளோம். சம்பளம் பற்றி கேட்டும், ஆஸ்பத்திரி உரிமையாளர்கள் “பவர்ஸ்டார்” சீனிவாசன், அவரது மனைவி துருவியா ஆகியோர் உரிய பதில் அளிக்கவில்லை.

எனவே எங்களது சம்பளம் கிடைக்க நடவடிக்கை எடுக்க வேண்டும் என்று கூறி உள்ளனர். இதுகுறித்து போலீசாரிடம் கேட்டபோது, புகாரின் அடிப்படையில் “பவர் ஸ்டார்” சீனிவாசன், அவரது மனைவி துருவியாவிடம் விசாரிப்பதற்காக செல் போனில் தொடர்பு கொண்டோம. அவர்களிடம் பேச முடியவில்லை. இது பற்றி உரிய நடவடிக்கை எடுப்போம் என்றனர்.