நடிகர் சித்தார்த் மீது போலீசில் புகார்

தெலுங்கில் முன்னணி நடிகராக இருப்பவர் சித்தார்த். தமிழில் பாய்ஸ், ஆயுத எழுத்து போன்ற படங்களில் நடித்தவர் சித்தார்த். இவர் மீது மதுரவாயல் லட்சுமி நகரை சேர்ந்த பாலு என்பவர் போலீஸ் கமிஷனரிடம் புகார் அளித்துள்ளார். அந்த புகார் மனுவில் பாலு கூறியிருந்ததாவது...

நான் வீடுகளுக்கு உள் அலங்காரம் செய்து வருகிறேன். ராஜா அண்ணாமலைபுரத்தில் வசிக்கும் நடிகர் சித்தார்த்தும், அவரது தந்தை சூரிய நாராயணனும் என்னிடம் அவர்கள் வீட்டுக்கு உள் அலங்காரம் செய்யும்படி கேட்டனர்.

அதற்கு ரூ.6 லட்சத்து 63 ஆயிரம் செலவாகும் என திட்ட மதிப்பீடு கொடுத்தேன், அவர்கள் சம்மதித்தனர். நானும் அவர்கள் வீட்டில் உள் அலங்கார பணியை செய்து முடித்தேன். ஆனால் பேசிய படி பணம் தரவில்லை. மொத்தம் ரூ.4 லட்சத்து 30 ஆயிரம் மட்டுமே தந்துள்ளனர். மீதி ரூ.2 லட்சத்து 37 ஆயிரத்தை தரவில்லை. பல தடவை அவர்களிடம் கேட்டு விட்டேன் தரவில்லை.

கடந்த 13ம் தேதி மீண்டும் சித்தார்த் வீட்டிற்குச் சென்று பணம் கேட்டேன். அப்போது சித்தார்த்தும், அவரது தந்தை சூரியநாராயணனும் பணம் தர முடியாது என்று சொல்லி எனக்கு கொலை மிரட்டல் விடுத்தனர் என்று புகாரில் கூறியிருதார்.