சென்னையில், 22-ந்தேதி ஐ.பி.எல். குழு கூட்டம்: பிளே ஆப் ஆட்டம் மாற்றப்படுமா?

ஐ.பி.எல். ஆட்சி மன்றகுழு கூட்டம் வருகிற 22-ந்தேதி சென்னையில் நடக்கிறது. இதை கிரிக்கெட் வாரிய வட்டாரங்கள் தெரிவித்தன. இந்த ஐ.பி.எல். ஆட்சி மன்ற குழு கூட்டத்தில் எதுபற்றி தீர்மானிக்கப்படும் என்பது பற்றி இதுவரை தெளிவாக தெரியவில்லை.

சென்னையில் நடை பெறும் இரண்டு பிளேஆப் ஆட்டம் பற்றி மீண்டும் உறுதி செய்வதற்காக இந்த கூட்டம் நடைபெறலாம் என்று கூறப்படுகிறது. அதே நேரத்தில் சென்னையில் 'பிளேஆப்' ஆட்டம் நடத்த ஐ.பி.எல். அணிகளின் சில உரிமையாளர்கள் எதிர்ப்பு தெரிவிக்கலாம் என்று கூறப்படுகிறது. இதனால் சென்னையில் நடைபெறும் 'பிளேஆப்' ஆட்டம் வேறு இடத்துக்கு மாற்றப்படுமா? என்பது அந்த கூட்டத்தின் முடிவில் தெரியவரும்.

இலங்கை தமிழர் பிரச்சினை காரணமாக சென்னையில் நடைபெறும் ஐ.பி.எல். போட்டிகளில் இலங்கை வீரர்கள் விளையாட எதிர்ப்பு தெரிவிக்கப்பட்டது. இதனால் சென்னையில் நடைபெறும் ஐ.பி.எல். போட்டிகளில் இலங்கை வீரர்கள் பங்கேற்க மாட்டார்கள் என்று ஐ.பி.எல். அமைப்பு தெரிவித்தது.

பிளேஆப் ஆட்டம் முக்கியமானவை என்பதால் அதில் இலங்கை வீரர்கள் விளையாடுவது அந்தந்த அணிகளுக்கு சிறந்தது. சென்னையில் இலங்கை வீரர்கள் விளையாட முடியாத நிலை இருப்பதால் இங்கு நடைபெறும் பிளேஆப் ஆட்டத்தை வேறு இடத்துக்கு மாற்ற ஐ.பி.எல். கூட்டத்தில் வலியுறுத்தப்படும். முதல் இரண்டு பிளேஆப் ஆட்டம் சென்னையில் நடக்கிறது. மே 21-ந்தேதி 'குவாலிபையர்1' ஆட்டமும், மே 22-ந்தேதி எலிமினேட்டர் ஆட்டமும் நடக்கிறது.