காசிமேட்டில் சுனாமி வீடுகளை வழங்க கோரி சாலை மறியல்

ராயபுரம் காசிமேடு அருகே உள்ள அண்ணா நகர் பகுதியில் சுமார் 3,500 குடிசை வீடுகள் இருந்தன. 2004-ல் சுனாமி ஏற்பட்டபோது இந்த 3,500 குடிசை வீடுகளும் பாதிக்கப்பட்டன.

பாதிக்கப்பட்ட மக்களுக்காக தமிழ்நாடு குடிசை மாற்று வாரியம் மூலம் காசிமேடு திருவொற்றியூரில் உள்ள ஆல் இந்தியா ரோடியோ பகுதியில் இடம் ஒதுக்கீடு செய்யப்பட்டு வீடுகள் கட்டப்பட்டன.

ஆனால் கட்டப்பட்ட வீடுகள் பாதிக்கப்பட்டவர் களுக்கு வழங்க படவில்லை. இதுகுறித்து பொதுமக்கள் அதிகாரியிடம் முறையீட்டும் வீடுகள் வழங்கப்படவில்லை.

தங்களுக்கு ஒதுக்கப்பட்ட வீடுகளை உடனடியாக வழங்க கோரி பொதுமக்கள் இன்று காலை அண்ணா நகர் பீச் ரோட்டில் சாலை மறியல் செய்தனர்.

தகவல் அறிந்ததும் உதவி ஆணையாளர் சிவசங்கரன், மீன்பிடி துறைமுக போலீசார் சம்பவ இடம் விரைந்து சென்று பொதுமக்களிடம் பேச்சுவார்த்தை நடத்தினர். தமிழ்நாடு குடிசை மாற்று வாரிய சுனாமி திட்டக்குழு உதவி பொறியாளர் சந்திரமோகன் பொது மக்களிடம் பேச்சுவார்த்தை நடத்தினார்.

அவர் இன்னும் 25 நாட்களில் ஒதுக்கப்பட்ட வீடுகள் வழங்கப்படும் என்று கூறியதை அடுத்து பொதுமக்கள் சாலை மறியலை கைவிட்டனர்.

இந்த சாலை மறியலால் 2 மணி நேரம் போக்குவரத்து கடுமையாக பாதிக்கப்பட்டது. அலுவலக பணிக்கு செல்பவர்களும், கல்லூரி, பள்ளிக்கு செல்லுபவர்களும் பெரும் சிரமத்திற்கு ஆளானார்கள்.