நேபாளத்தில் ஜனநாயகம் வலுப்பெற இந்தியா தொடர்ந்து ஆதரவு அளிக்கும்

இமயமலைப் பகுதியில் அமைந்துள்ள நேபாள நாடு இந்து நாடு என்று அழைக்கப்படுகிறது. இங்கு கடந்த 2008-2009-ம் ஆண்டில் நேபாள மாவோயிஸ்ட் கட்சியைச் சேர்ந்த புஷ்பா கமல் டஹல் பிரசாந்தா பிரதமர் பதவி வகித்தார்.

முன்னாள் கொரில்லாப்படை தலைவரான பிரசாந்தா, ராணுவ அமைச்சரை அப்போது பதவி நீக்கம் செய்தார். இந்த விவகாரத்தில் அதிபர் ராம் பரன் யாதவுடன் பிரச்சினை ஏற்பட்டது. இதையடுத்து பிரசாந்தா, ஆட்சியில் இருந்து அகற்றப்பட்டார்.

இந்நிலையில், நேபாளத்தில் வரும் நவம்பர் மாதம் தேர்தல் நடத்தி, புதிய அரசியலமைப்புச் சட்டத்தை உருவாக்க திட்டமிடப்பட்டுள்ளது. இந்த தேர்தல் மற்றும் பல்வேறு விஷயங்களில் இந்தியாவின் ஆதரவை கோருவதற்காக பிரசாந்தா இந்தியா வந்துள்ளார்.

அவர் இன்று டெல்லியில் வெளியுறவு துறை அமைச்சர் சல்மான் குர்ஷித்தை சந்தித்து பேசினார். இந்த சந்திப்பிற்கு பிறகு பேசிய சல்மான் குர்ஷித், நேபாளத்தில் ஜனநாயகத்தை வலிமைப்படுத்த தேவையான அனைத்து உதவிகளையும் இந்தியா செய்யும் என்று கூறினார்.

இந்தியா-சீனாவிற்கு இடையே நேபாளம் ஒரு பாலமாக விளங்கும் நிலையில், மாவோயிஸ்ட் தலைவரான பிரசாந்தாவுடன் இந்தியா ஒத்துப்போகுமா என்று கேள்வி எழுந்துள்ளது.