பண பிரச்சினையால் அஜீத்தின் “மங்காத்தா” படம் கைவிடப்பட்டதா? இயக்குனர் வெங்கட்பிரபு

அஜீத், திரிஷா ஜோடியாக நடிக்கும் படம் “மங்காத்தா”. வெங்கட்பிரபு இயக்குகிறார். இது அஜீத்தின் 50-வது படம் என்பது குறிப்பிடத்தக்கது. இந்த படத்துக்கு பண பிரச்சினை ஏற்பட்டதாகவும் எனவே படத்தை கைவிட்டு விட்டதாகவும் செய்திகள் வெளியாயின.

இதுபற்றி இயக்குனர் வெங்கட்பிரபுவிடம் கேட்ட போது, மறுத்தார். அவர் கூறியதாவது:-

“மங்காத்தா” படம் கை விடப்பட்டதாக வெளியான செய்தி என்னை மிகவும் சங்கடப்படுத்தியது. படப்பிடிப்பில் பிரச்சினை எதுவும் எழவில்லை. பாங்காக்கில் படப்பிடிப்பை முடித்து வந்துள்ளோம்.

சென்னையில் தற்போது மும்பை தாராவி போன்ற செட் போட்டு படப்பிடிப்பு நடத்தப்படுகிறது. மழையால் அரங்கு சேதமாகி படப்பிடிப்பு பாதிக்கப்பட்டது. ஒருநாள் படப்பிடிப்பை ரத்து செய்தோம். வசன காட்சிகள் பெரும்பகுதி படமாக்கப்பட்டு விட்டது.

இந்த நிலையில் படத்தை கைவிட்டு விட்டதாக வதந்திகள் பரவியது எப்படி என்று புரியவில்லை.

இவ்வாறு வெங்கட்பிரபு கூறினார்.