மிஷ்கினின் அடுத்த பட பட்ஜெட் ரூ.35 கோடி!

டைரக்டர் மிஷ்கின் அடுத்து இயக்கப்போகும் புதிய படத்திற்கு ரூ.35 கோடி பட்ஜெட் போட்டிருக்கிறார். யுத்தம் செய் படத்திற்கு பிறகு மிஷ்கின் இயக்கும் படத்தை லிங்குசாமி தயாரிப்பதாக இருந்தது. பின்னர் மிஷ்கினும், லிங்குசாமியும் இணைந்து தயாரிக்கப் போவதாக தகவல்கள் வெளியாயின.

பின்னர் படமே கைவிடப்பட்டதாகவும் செய்திகள் வெளியாயின. அதனை உறுதி செய்யும் வகையில் லிங்குசாமிக்காக ஆர்யா கொடுத்திருந்த தேதிகளை அதே லிங்குசாமி தயாரிப்பில் பிரபுசாலமனுக்கு மாற்றிக் கொடுத்திருக்கிறார்களாம். ஏன் இந்த குழப்பம் என்று விசாரித்தால்… அந்த படத்திற்கு மிஷ்கின் போட்டிருக்கும் பட்‌ஜெட் ரூ.35 கோடியாம்.

இதுஒருபுறமிருக்க, மிஷ்கின் கொடுத்த கதையில், ம‌னதை பறிகொடுத்த ஆர்யா, லிங்குசாமி தயாரிக்கவில்லையென்றால் பரவாயில்லை. வேறொரு தயாரிப்பாளருடன் வந்தால் கண்டிப்பாக நடித்து தருகிறேன், என்று கூறியிருக்கிறாராம். இதனால் பல தயாரிப்பாளர்களை மிஷ்கின் அணுகி வருகிறார். அவர் அணுகும் தயாரிப்பாளர்கள் எல்லோருமே ஆர்யா – மிஷ்கின் கூட்டுக்கு இவ்வளவு பெரிய பட்ஜெட் தாங்குமா என்று கால்குலேஷனில் இறங்கியிருக்கிறார்களாம்.