அரசியலில் இன்ட்ரஸ்ட் இல்ல – சிம்ரனின் பளிச் பதில்

சினிமாவுக்கு வேண்டுமானால் சிம்ரன் பழசாக இருக்கலாம். சின்னத்திரையை பொறுத்தவரை அவர் புதுசோ புதுசு. கடந்த பத்தாண்டுகளாக ஒரு ஷோ, தன் ரசிகர்களை பிளேடு போடாமல் ரசிக்க வைக்கிறதென்றால் அது ஜாக்பாட் நிகழ்ச்சிதான் குஷ்புவின் கொச்சை தமிழில் ஆரம்பித்து சிம்ரனின் செல்லத் தமிழ் வரைக்கும் வந்திருக்கிறது நிகழ்ச்சி. இடையில் வந்த நதியா, என்ன காரணத்தினாலோ திரும்பவும் மும்பைக்கே போய்விட்டார்.

13 -வது ஆண்டில் அடியெடுத்து வைக்கும் ஜெயா டி.வி இந்த ஜாக்பாட் நிகழ்ச்சியில் சிம்ரனோடு இணைந்திருப்பதால், டி.ஆர்.பி ரேட்டிங் ஏரியாவில் திருவிழா மேளம்தான்! அதிருக்கட்டும்… இந்த அறிவிப்புகளை வெளியிடும் நிகழ்ச்சிக்கு வந்திருந்தார் சிம்ரன். எலுமிச்சை கலரில் இன்னும் கொஞ்சம் மினுமினுப்பு. 50 கிலோ தாஜ்மஹாலுக்கு சுற்று சுவர் கட்டிய மாதிரி லேசாக பூசிய உடம்பு. ஆனால் அதே பழைய சிம்ரன்தான் பேச்சிலும், நிதானத்திலும்.

பொதுவா ஜாக்பாட் நிகழ்ச்சின்னாலே ஜாக்கெட்தான் ஃபேமஸ்.! குஷ்பு அதில் தனி கவனம் செலுத்தினாங்க. நீங்க என்ன பண்ண போறீங்க? இந்த கேள்விக்கு கொஞ்சம் யோசித்தவர், ஜாக்கெட் மேளா தொடரும். ஆனால் நிகழ்ச்சியில் இன்னும் பல சுவாரஸ்யங்கள் இருக்கு. போக போக பாருங்க என்றார். அரசியல் தொடர்பான அடுத்தடுத்த கேள்விகளுக்கு ’ஆரம்பிச்சுட்டாங்கப்பா… ’ என்று அலுப்புப் பார்வை பார்த்தாலும், எனக்கு அதில் இன்ட்ரஸ்ட் இல்ல என்று பதிலளித்தது நல்ல விஷயம்.

இந்த 13 வது ஆண்டில் ’பழையன கழிதலும்’ என்ற தத்துவத்தையும் பின்பற்றியிருக்கிறது ஜெயா டி.வி. இதுவரை சினிமா விமர்சன பகுதியை ஏற்று வந்த சுஹாசினி விலக்கப்பட்டு எழுத்தாளரும், பத்திரிகையாளருமான மதன் நியமிக்கப்பட்டிருக்கிறார்.

புதிய நிகழ்ச்சிகளாக யூசி சேதுவின் யூகியுடன் யூகியுஙகள், சமையல் சாம்பியன் யாரு என்ற நிகழ்ச்சியையும் நடத்தப் போகிறது ஜெயா.டி.வி