நடிகர் முரளியின் முதலாம் ஆண்டு நினைவஞ்சலி!!

25 ஆண்டுகளுக்கு மேலாக தமிழ் சினிமாவில் நிலைத்து நின்று, இந்த மண்னை விட்டு நீங்கிய நடிகர் முரளிக்கு இன்று(08.09.11) முதலாம் ஆண்டு நினைவு அஞ்சலி கடைபிடிக்கப்படுகிறது. சத்யஜோதி பிலிம்ஸ் சார்பில் உருவான, “பூவிலங்கு” படத்தின் மூலம் தமிழ் சினிமாவில் கதநாயகனாக அறிமுகமானவர் நடிகர் முரளி. முதல்படத்திலேயே அனைவரின் பாராட்டை பெற்ற முரளி, தொடர்ந்து இதயம், புதுவசந்தம், அதர்மம், காலமெல்லாம் காதல் வாழ்க, வெற்றிக்கொடிக்கட்டு, சுந்தரா டிராவல்ஸ் உள்ளிட்ட ஏராளமான வெற்றிப்படங்களில் நடித்துள்ளார்.

ஒரு காலத்தில் முன்னணி நடிகர்களுக்கு போட்டியாக, ஆண்டுக்கு 5 அல்லது 6 படங்களில் நடித்து வந்த நடிகர் முரளி, காதல், காமெடி ஆக்ஷன் என அனைத்து அவதாரங்களையும் எடுத்துள்ளார். சினிமாவில் 25ஆண்டுகளுக்கு மேலாக வெற்றிக்கொடி நாட்டிய முரளி, தனது மகன் அதர்வாவை பாணா காத்தாடி படம் மூலம் கதாநாயகனாக அறிமுகமாக்கி அழகுபார்த்தார். மேலும் அந்த படத்தில் அவரும் ஒருசின்ன ரோலில் வந்து அசத்தினார். முரளியை அறிமுகப்படுத்திய சத்யஜோதி நிறுவனமே, அதர்வாவையும் அறிமுகப்படுத்தியது.

தனது மகனின் முதல்படமான பாணா காத்தாடி படத்தின் வெற்றியை முழுசா கொண்டாடுவதற்குள்ளேயே, கடந்த ஆண்டு இதேநாளில் (08.09.10), திடீரென நெஞ்சுவலியால் முரளி மரணம் அடைந்தார். மகனுடன் நடித்த படமே அவருக்கு கடைசி படமாக அமைந்துவிட்டது. முரளி மறைந்து இன்றுடன் ஓராண்டு ஆகிவிட்டது. இந்த மண்ணைவிட்டு அவர் மறைந்தாலும், அவரது நினைவுகள் இன்றும், அவரது ரசிகர்கள் நெஞ்சில் நிலை கொண்டுதான் உள்ளது. முரளியின் முதலாம் ஆண்டு நினைவையொட்டி அவரது ரசிகர்கள் பலரும், அவரது படத்திற்கு அஞ்சலி செலுத்தி வருகின்றனர்.