அழைத்தார் மணிரத்னம்; மறுத்தார் கீர்த்தனா

முதுகுக்கு பின்னால் நிற்கிற அதிர்ஷ்டம் முகத்திற்கு நேரே வந்த மாதிரிதான், மணிரத்னம் படத்தில் நடிக்க வாய்ப்பு கிடைப்பதும். ஆனால் அதையே வேண்டாம் என்று மறுக்கிற தைரியமும் தன்னம்பிக்கையும் யாருக்கு வரும்? புதுமைப்பித்தனின் வாரிசு இப்படி மறுக்க, அடி ஆத்தி என்று அசந்து போயிருக்கிறது மொத்த ஏரியாவும்.

இந்தியாவின் முக்கிய திரைப்பட இயக்குனர்களில் ஒருவராக இருக்கும் மணிரத்னம், சமீபகாலமாக சறுக்கி வருவதை கவலையோடு பார்க்கிறார்கள் சினிமா ஆர்வலர்கள். இதற்கெல்லாம் முற்றுப்புள்ளி வைப்பது போல முழுக்க முழுக்க நமது மண்ணிலேயே ஒரு படத்தை இயக்கவிருக்கிறார் அவர். இதில்தான் கார்த்திக்கின் மகன் கவுதம் அறிமுகமாகிறார். இவ்ருக்கு ஜோடியாக நடிக்க இளம் நடிகைகளுக்கு வலை வீசிய மணிரத்னம், ஏகப்பட்ட அழகிகளை பார்த்த பின்பும் திருப்தியுறாமல் உதட்டை பிதுக்கியது தனி சோகம்.

இந்த நேரத்தில் அவரது மனதில் பளிசென்று வந்தது கீர்த்தனாவின் முகம். கன்னத்தில் முத்தமிட்டால் படத்தில் குழந்தையாக நடித்திருந்த கீர்த்தனா, இன்று தோளுக்கு மேல் வளர்ந்த தோழியாக நிற்கிறார். உடனே அவரை வரவழைத்த மணி, ‘ஹீரோயினா நடிக்கிறீயா?’ என்றாராம். அந்த இடத்திலேயே இதற்கு பதிலளித்த கீர்த்தனா, ‘அங்கிள் எனக்கு நடிப்பதில் விருப்பம் இல்ல. என்னை உங்க அசிஸ்டென்ட்டா சேர்த்துக்கிறீங்களா?’ என்றாராம்.

துணிச்சலான பெண்களுக்கு தோல்வி ஏது? ஸ்பாட் அப்ரூவல் செய்தாராம் மணிரத்னம். புதிய பட வேலைகளில் பம்பரமாக சுற்றிக் கொண்டிருக்கிறார் கீர்த்தனா. கீர்த்தனா சென்னை லயோலா கல்லூரியில் விசுவல் கம்யூனிகேஷன் டிகிரி முடித்துள்ளார்..