மேனேஜர் மாற்றம்…? – அமலா பால் அதிரடி

வெட்ட வெளிச்சத்துக்கும், நட்ட நடுநிசிக்கும் நடுவில் நின்று தள்ளாடுவதுதான் பெரும்பாலான நடிகைகளின் பிராப்தம். அப்படி ஒரு சிக்கல் அடிக்கடி வந்து தொலைக்கிறதாம் அமலாபாலுக்கு. அதன் உச்சக்கட்டமாக தனது மேனேஜரிடமே சண்டை போட்டு ஜகா வாங்குகிற அளவுக்கு போய்விட்டார் என்பதுதான் லேட்டஸ்ட் நிலவரம்.

ஒரு நடிகை கால்ஷீட் சொதப்புவதும், கால் வாரப்படுவதும் மேனேஜர்களின் அலட்சியத்தை பொறுத்தது என்பதை சற்று தாமதமாகதான் புரிந்து கொண்டார் அமலா. வேட்டை படத்தை முடிக்க மூன்றே மூன்று நாட்கள் கொடுத்தால் போதும். ஆனால் முடியாதளவுக்கு கால்ஷீட் குழப்பம். ஐஸ்வர்யா ரஜினி இயக்கும் 3 படத்தில் நானாக வெளியேறவில்லை. ஏன் வெளியேற்றப்பட்டேன் என்பதே புரியவில்லை என்று அமலாவே புலம்புகிற அளவுக்கு அங்கும் பிரச்சனை. இவ்வளவையும் பொறுத்துக் கொண்ட அமலாவுக்கு இன்னொன்றை சகிக்கவே முடியவில்லையாம்.

அது?

விக்ரம் நடிக்கும் தாண்டவம் படத்தில் அவருக்கு ஜோடியாக நடிக்க அமலா பெயர்தான் முதலில் பரிந்துரைக்கப்பட்டதாம். ஆனால் கடைசியில் அவருக்கு ஜோடியானது இவரல்ல. இத்தனைக்கும் விக்ரமின் மேனேஜர்தான் அமலாவுக்கும் மேனேஜர். இவ்வளவு நடந்த பிறகும் இவரை வைத்துக் கொள்ள வேண்டுமா என்று நினைக்கிறாராம் அமலா.

பாலைவனத்துக்கு வாக்கப்பட்டாச்சு, பாதச் சூட்டுக்கு அஞ்சுவானேன்?