ரசிகர்களுக்காக “மய்யம்” பெயரில் கமலின் இணைய தளம்

கமலஹாசன் ரசிகர்களுக்காக ஏற்கனவே மய்யம் பெயரில் பத்திரிகை நடத்தினார். ஆனால் அது திடீரென நிறுத்தப்பட்டது. தற்போது அதை வெப்சைட்டாக மாற்றியுள்ளார். ரசிகர்மன்ற நிகழ்ச்சிகள், தனது படங்கள் பற்றிய விவரங்கள், புகைப்படங்கள், இலக்கிய கட்டுரைகள் போன்றவற்றை இந்த இணைய தளத்தில் போட்டு வைக்க திட்டமிட்டுள்ளார்.

இதன் மூலம் ரசிகர்களுடன் நேரடியாக கலந்துரையாடவும் முடிவு செய்துள்ளார். அரசியல், சினிமா உள்ளிட்ட பல்வேறு துறைகளில் தனது பார்வை பற்றிய கருத்துக்களையும் இதில் பதிவு செய்கிறார். மய்யம் இணையதளத்துக்கு புதிய பொறுப்பாளர்கள் நியமிக்கப்பட உள்ளனர்.

இதற்கிடையில் இந்திய தொழில் வர்த்தக கூட்டமைப்பின் தலைவராக உள்ள கமல் சென்னையில் நாளை மற்றும் நாளை மறுநாள் ஊடகம் மற்றும் பொழுதுபோக்கு தொழில் துறை மாநாட்டுக்கு ஏற்பாடு செய்துள்ளார். லீராயல் மெரிடியன் ஓட்டலில் இந்த மாநாடு நடக்கிறது. ஊடகம், மற்றும் பொழுதுபோக்கு தொழில் துறை பிரதிநிதிகள் பங்கேற்று பேசுகின்றனர்.