நமக்கு தமிழ் சினிமா தாங்க… சசிகுமார்!

சுப்ரமணியபுரம் படம் மூலம் தன்னை ஒரு நல்ல இயக்குநராக அடையாளம் காட்டி கொண்ட சசிகுமார், நாடோடிகள் படம் மூலம் சிறந்த நடிகராகவும் அறியப்பட்டார். சுப்ரமணியபுரம் எல்லா மொழிகளிலும் நல்ல வரவேற்பை பெற்றது. ‌கேரளாவில் ஒரு நாவலாக கூட வெளியிட்டு மகிழ்ந்தார். சிறந்த இயக்குநர் கம் நடிகரான சசிகுமாரை, மலையாள சினிமா சிவப்பு கம்பளம் போட்டு வரவேற்றுள்ளது. மலையாளத்தில் மாஸ்டர்ஸ் என்ற படத்தில் நடித்திருக்கிறார். இப்படத்தில் ப்ருத்விராஜ், அனன்யா, மித்ரா, சந்தியா என்று ஒரு பெரிய நட்சத்திர கூட்டமே நடித்திருக்கிறது. அவர்களோடு சசிகுமாரும் சேர்ந்து பத்திரிக்கையாளர் ரோலில் நடித்திருக்கிறார். சில தினங்களுக்கு முன்னர் இப்படம் ரிலீஸாகி நன்றாக போய் கொண்டு இருக்கிறது.

இதுபற்றி சசிகுமாரிடம் நம்மிடம் பேசுகையில், மாஸ்டர்ஸ் படத்தின் இயக்குநர் ஜானி ஆண்டனி இந்த படத்தில் நடிக்க என்னை கேட்டபோது, மொழி தெரியாததால் கொஞ்சம் யோசித்தேன். பிறகு படத்தின் கதை என்னை சுற்றியே நகர்வதாலும், படத்தின் கதை‌ பிடித்ததாலும் ஒரு வழியாக நடிக்க சம்மதித்தேன். 3 மாதத்திற்கு முன்பே படத்தின் கதையை எனக்கு கொடுத்‌ததால், ரொம்ப கவனமாக எல்லா டையலாக்கையும் முன்னாடியே மனப்பாடமாக படித்துவிட்டேன். இப்போதும் தூக்கத்தில் எழுப்பி கேட்டாலும் படத்தின் டயலாக்கை அப்படியே சொல்வேன். முதன்முறையாக நான் பத்திரிக்கையாளர் வேடத்தில் நடித்திருக்கிறேன். கடந்த வாரம் வெளிவந்த இப்படம் நன்றாக போய் கொண்டு இருக்கிறது. ரொம்ப மகிழ்ச்சியாக இருக்கிறது. அதற்காக தொடர்ந்து மலையாள படத்திலேயே நடிப்பீங்களா என்று கேட்காதீங்க, தமிழிலேயே நிறைய வொர்க் இருக்கு. இப்போதைக்கு நமக்கு தமிழ் சினிமா மட்டும் தான் என்றார்.