விஜய் உள்ளிட்ட நடிகர்களுக்கு கிடைக்காதது விஜயகாந்த் மகனுக்கு கிடைத்தது…!

தெலுங்கில் ஒரு படத்தின் ரீ-மேக் உரிமையை விஜய் உள்ளிட்ட முன்னணி நடிகர்கள் பலரும் கேட்டு, அவர்களுக்கு கிடைக்காதது, இப்போது விஜயகாந்தின் மகன் சண்முகப்பாண்டியனுக்கு கிடைத்திருக்கிறது. நடிகர் விஜயகாந்தின் இளைய மகன் சண்முகப்பாண்டியன், அவரது அப்பாவை போலவே சினிமா மீது ஆர்வம் கொண்டுள்ளார். மகனின் விருப்பத்தை ஏற்று அவரை சினிமாவில் களம் இறங்க விஜயகாந்தும் முயற்சித்து வருகிறார். இதற்காக பல டைரக்டர்களிடமும் ‌கதை கேட்டு வருகிறார். ஆனால் இதுவரை விஜயகாந்த் கேட்ட கதைகள் எதுவும் திருப்தியில்லை. இதனால் தெலுங்கு படத்தை ரீ-மேக் செய்ய எண்ணியிருந்தார். இதற்காக தெலுங்கின் பல படங்களையும் அவர் பரிசீ‌லனை செய்துள்ளார். அதில் கடைசியாக அவர் திருப்தியடைந்த படம் பிருந்தாவனம்.

தெலுங்கில் ஜூனியர் என்.டி.ஆர்., காஜல் அகர்வால், சமந்தா ஆகியோர் நடிப்பில் வெளியாகி சூப்பர் ஹிட்டான படம் இந்த பிருந்தவானம். பிருந்தாவனம் படத்தின் ரீமேக் உரிமைக்கு விஜய் உள்ளிட்ட தமிழின் முன்னணி நடிகர்கள் பலர் இடையே கடும் போட்டி நிலவியது. ஆனால் அவர்களுக்கு எல்லாம் கொடுக்காத தயாரிப்பாளர், விஜயகாந்த் மகனுக்கு என்றதும் பேரம் பேசாமல் கொடுத்துவிட்டார் என்று கூறப்படுகிறது.

இப்படத்தை விஜயகாந்தின் கேப்டன் சினி கிரியேஷன்ஸே தயாரிக்க இருக்கிறது. படத்தில் சண்முகப்பாண்டியனுக்கு ஏற்ற கதாநாயகி தேர்வு நடந்து வருகிறது. விரைவில் இப்படம் பற்றிய முழு அறிவிப்புகள் வெளியாகலாம்.