3 ஆண்டுக்கு பின் நடிக்கிறார் மீண்டும் மும்தாஜ்

நடிகை மும்தாஜ் மூன்று ஆண்டு இடைவெளிக்கு பிறகு மீண்டும் சினிமாவில் நடிக்கிறார். இவருக்கு 32 வயது ஆகிறது. 1999-ல் மோனிஷா என் மோனலிஷா படம் மூலம் தமிழில் அறிமுகமானார். பட்ஜெட் பத்மநாபன், குஷி, வேதம், ரோஜா கூட்டம், குத்து, ஏய் உள்ளிட்ட பல படங்களில் நடித்தார்.

சாக்லேட் படத்தில் மும்தாஜ் ஆடிய மலமல பாடல் ரசிகர்கள் மத்தியில் பிரபலம். வில்லியாக நடித்த ராஜாதி ராஜா படம் 2009-ல் ரிலீசானது. அதன் பிறகு மும்தாஜ்க்கு பட வாய்ப்புகள் இல்லாமல் போனது. சில டி.வி.நிகழ்ச்சிகளில் அவர் பங்கேற்று வந்தார். மும்தாஜ்க்கு தற்போது மீண்டும் படங்களில் நடிக்க வாய்ப்பு வந்துள்ளது.

மலையாளத்தில் தயாராகும் ‘பிரிவியூ’ என்ற படத்தில் நடிக்கிறார். இதில் திருமணம் செய்து கொண்டு சினிமாவை விட்டு ஒதுங்கிய முன்னாள் நடிகை ஒருவரின் கேரக்டரில் வருகிறார். டேனியல் பாலாஜி, மக்பூல் சல்மான், லட்சுமி ராய் ஆகியோரும் இதில் நடிக்கின்றனர். கசீம் மாரீக்கர் இயக்குகிறார். இப்படத்தை தமிழில் வெளியிடவும் முயற்சி நடக்கிறது. வேறு சில தமிழ் படங்களில் நடிக்கவும் மும்தாஜ்க்கு வாய்ப்பு வந்துள்ளது.