கருப்பை கேன்சர்: 10ம் தேதி மனீஷா கொய்ராலாவுக்கு அமெரிக்காவில் ஆபரேஷன்

மும்பை: கருப்பை புற்றுநோயால் பாதிக்கப்பட்டுள்ள பாலிவுட் நடிகை மனீஷா கொய்ராலாவுக்கு வரும் 10ம் தேதி நியூயார்க்கில் உள்ள மருத்துவமனை ஒன்றில் அறுவை சிகிச்சை நடைபெறுகிறது.
பாலிவுட் நடிகை மனீஷா கொய்ராலா கடந்த மாதம் 28ம் தேதி மும்பையில் உள்ள ஜஸ்லோக் மருத்துவமனையில் அனுமதிக்கப்பட்டார். அங்கு மருத்துவப் பரிசோதனைகள் செய்ததில் அவருக்கு கருப்பை புற்றுநோய் உள்ளது கண்டுபிடிக்கப்பட்டது என்று கூறப்பட்டது. ஆனால் இது குறித்து மனீஷா தரப்பு எதுவும் தெரிவிக்காமல் இருந்தது.
தொடர்ந்து மனீஷா சிகிச்சைக்காக கடந்த வாரம் மும்பையில் இருந்து அமெரிக்கா சென்றார்.
இந்நிலையில் இது குறித்து மனீஷாவின் மேனேஜர் சுப்ரதோ கோஷ் கூறுகையில்,
மனீஷாவுக்கு கருப்பை புற்றுநோய் உள்ளது கண்டுபிடிக்கப்பட்டுள்ளது. அதற்காக அவர் நியூயார்க்கில் உள்ள மருத்துமனை ஒன்றில் சிகிச்சை பெற்று வருகிறார். வரும் 10ம் தேதி அவருக்கு அறுவை சிகிச்சை செய்கின்றனர். இன்றைக்கு தான் அறுவை சிகிச்சை நடப்பதாக இருந்தது. ஆனால் மருத்துவர்கள் சில பரிசோதனைகள் செய்த பிறகு அறுவை சிகிச்சையை வரும் 10ம் தேதிக்கு தள்ளி வைத்தனர் என்றார்.