அத்வானியை கொல்ல முயன்ற வழக்கு: மேலும் 3 பேர் கைது

பாரதீய ஜனதா தலைவர் களில் ஒருவரான அத்வானி கடந்த 2011-ம் ஆண்டு மதுரையில் இருந்து திருமங்கலம் வழியாக தென்காசி செல்ல இருந்தார். அப்போது அவரது வழி பாதையை போலீசார் சோதனை செய்தபோது திருமங்கலத்தை அடுத்த ஆலம்பட்டி பாலம் பகுதியில் பைப் வெடிகுண்டு இருந்ததை போலீசார் கண்டு பிடித்தனர்.

அத்வானியை கொலை செய்யும் திட்டத்துடன் வைக்கப்பட்ட பைப் வெடிகுண்டை பறிமுதல் செய்த போலீசார் தீவிர விசாரணை நடத்தி 3 பேரை அப்போது கைது செய்தனர். இந்த வழக்கில் போலீஸ் பக்ருதீன் உள்பட மேலும் 9 பேரை போலீசார் தேடி வந்தனர்.

இதுகுறித்து மத்திய புலனாய்வு பிரிவு போலீசார் ரகசிய கண்காணிப்பில் ஈடுபட்டு வந்தனர். இந்த நிலையில் வழக்கில் தொடர்புடைய மதுரை நெல்பேட்டை தர்வீஸ் மைதீன் (வயது 44), வில்லாபுரம் 'பேக்' கடை செய்யது (35), குப்புப் பிள்ளை தோப்பு பகுதியை சேர்ந்த முஸ்தபா (26) ஆகியோரை இன்று மத்திய புலனாய்வு பிரிவினர் கைது செய்துள்ளனர்.

இந்த வழக்கில் தொடர்ந்து தலைமறைவாகி உள்ள போலீஸ் பக்ருதீன் உள்பட 3 பேரை போலீசார் தீவிரமாக தேடி வருகிறார்கள்.