இசைப் பள்ளி துவக்குகிறார் சோனியா அகர்வால்

சினிமாவில் அறிமுகம், இயக்குநருடன் திருமணம், பின்பு விவாகரத்து என்று பிரிந்து மீண்டும் தான் விட்ட கதாநாயகி என்ற இடத்தைப் பிடித்த ஒரே நாயகி சோனியா அகர்வாலாகத்தான் இருக்க முடியும். திருமண வாழ்க்கைக்குப் பிறகு சினிமாவுக்கு நடிகைகள் திரும்புவது ஒன்றும் புதிதல்ல என்றாலும், கதாநாயகியாகவே திரும்பியிருக்கும் சோனியா அகர்வால் வானம் படத்தில் நடித்தார். தற்போது மேலும் 3 படங்கள் திரைக்கு வரத் தயாராகி வருகின்றன. இதற்காக அவருக்கு நிச்சயம் பாராட்டுக்களைக் கூறத்தான் வேண்டும்.

ஒரு பாராட்டு மட்டும் போதாது போலவே.. ஆம் இன்னும் ஒரு பாராட்டையும் தயாரித்துக் கொள்ளுங்கள். எதற்கு என்றால், வெறும் சினிமாவில் நடிப்பதோடு நின்றுவிடாமல், தற்போது இசைப் பள்ளி ஒன்றையும் துவக்க உள்ளார் சோனியா அகர்வால்.

சென்னையில் வரும் 26ம் தேதி ஞாயிற்றுக்கிழமையன்று ஹாரிஸ் ஜெயராஜ் இசைப் பள்ளியை துவக்கி வைக்கிறார். இந்த இசைப் பள்ளியை அகர்வாலின் சகோதரர் நிர்வகிக்க உள்ளார். இவர் யுவன் சங்கர் ராஜாவிடம் இசைப் பயிற்சி பெற்றவர் என்பது குறிப்பிடத்தக்கது.