சமூக சேவையில் நட்சத்திரங்கள்

சினிமா நட்சத்திரங்கள் என்றாலே புரளி கிளம்புவதும், அவர்களைப் பற்றி அவதூறான செய்திகள் வெளியாவதும்தான் வழக்கம். ஆனால் அவர்கள் செய்யும் பல நல்ல விஷயங்கள் வெளியே தெரியாமலேயேப் போய்விடுகிறது.

சமீபத்தில் பாடகரும், நடிகரும், தயாரிப்பாளருமான எஸ்.பி. பாலசுப்ரமணியம் என்கிற எஸ்பிபி எய்ட்ஸ் பாதித்த குழந்தைகள், முதியோர் இல்லம், அனாதை குழந்தைகளுக்கான பள்ளி என மூன்று சமூக இல்லங்களுக்கு நிதியுதவி அளித்துள்ளார்.

இது ஏதோ புதிய விஷயமல்ல என்கிறார்கள் தகவல் அறிந்த வட்டாரங்கள். எப்போதுமே எஸ்பிபி சமூக அக்கறையோடு இதுபோன்ற உதவிகளைச் செய்து வருகிறார். இப்போது இந்த மூன்று அமைப்புகளை தேர்வு செய்துள்ளார் என்கிறது அந்த வட்டாரம்.

அங்கிருந்து கிளம்பி வரும் வழியில், சென்னையில் கடந்த ஞாயிறன்று பார்த்திபன் நடத்திய ரத்த தான முகாம் நம் கண்ணில் பட்டது. அங்கு ஏராளமானோர் ரத்த தானம் செய்து கொண்டிருந்தனர். பொதுமக்கள் மட்டுமல்லாமல், விவேக், ரோஹினி போன்ற திரை நட்சத்திரங்களும் ரத்த தானம் அளித்தனர்.

சினிமாவில் கிடைக்கும் புகழை நல்ல காரியங்களுக்குப் பயன்படுத்துவது குறித்து இவர்களுக்கு பாராட்டுக்களை தெரிவித்துக் கொண்டு விடைபெற்றோம்.