இசை விழாவில் சினிமா நட்சத்திரங்கள்

சென்னை : ‘சென்னையில் திருவையாறு’ என்ற இசை நிகழ்ச்சி, கடந்த 7 வருடங்களாக சென்னையில் நடந்து வருகிறது. 8,வது நிகழ்ச்சி, நாளை தொடங்கி 25,ம் தேதி வரை நடக்கிறது. கவர்னர் ரோசையா துவக்கி வைக்கிறார். பஞ்சரத கீர்த்தனைகளுடன் தொடங்கி ஒரு வாரம் சென்னை காமராஜர் அரங்கில் நடைபெறுகிறது. இந் நிகழ்ச்சியில், பாலமுரளி கிருஷ்ணா, பி.எஸ்.நாராயணசாமி, நித்யஸ்ரீ மகாதேவன், பர்வீன் சுல்தானா, அருணா சாய்ராம் உட்பட 60 கலைஞர்களின் இசை மற்றும் நடன நிகழ்ச்சிகள் நடக்கிறது.

காலை 7 மணிக்கு துவங்கும் நிகழ்ச்சிகள் இரவு 9 மணி வரை தொடர்ந்து நடக்கிறது. இவ் விழாவில் கடந்த ஆண்டை விட, இந்த ஆண்டு சினிமா நட்சத்திரங்கள் அதிக அளவில் பங்கேற்கிறார்கள். ஷோபனாவின் நடன நிகழ்ச்சி நடக்கிறது. திரைப்பட பாடகர்கள் உன்னி கிருஷ்ணன், கார்த்திக், பாடகிகள் ஷோபா சந்திரசேகரன், மகாநதி ஷோபனா, சுதா ரகுநாதன் பாடுகிறார்கள். இதற்கான ஏற்பாடுகளை லஷ்மன் ஸ்ருதி நிறுவனம் செய்து வருகிறது.