ராஜிநாமா முடிவில் மாற்றம் இல்லை: அமீர்

தமிழ்நாடு திரைப்பட இயக்குநர் சங்கத்திலிருந்து விலகியது விலகியதுதான்; ராஜிநாமாவை வாபஸ் பெற முடியாது என இயக்குநர் அமீர் தெரிவித்தார்.

"தாண்டவம்' படத்தின் கதை உரிமை விவகாரம் தொடர்பாக இயக்குநர் சங்கத்தின் செயலாளரான அமீருக்கும் உதவி இயக்குநர்களுக்கும் பிரச்னை ஏற்பட்டது. இதையடுத்து தனது செயலாளர் பதவியை கடந்த வியாழக்கிழமை ராஜிநாமா செய்தார் அமீர்.

இது குறித்து அமீர் சனிக்கிழமை வெளியிட்ட அறிக்கை: தமிழ்நாடு திரைப்பட இயக்குநர் சங்கத்தின் நிர்வாகிகள் அனைவரும் என் மீது நம்பிக்கை வைத்து சங்கத்தின் செயலாளர் பதவியை மீண்டும் ஏற்றுக்கொள்ள வேண்டும் எனக் கேட்டுக்கொண்டனர். சங்கத்தில் தீய சக்திகள் நுழைந்துவிடாமல் தடுக்கும் நோக்கத்தில் நன்கு யோசித்துதான் ராஜிநாமா என்ற நிலைப்பாட்டை மேற்கொண்டேன்.

எனவே, எனது ராஜிநாமா முடிவை வாபஸ் பெறாமல் சங்கத்தின் உறுப்பினராக தொடர்ந்து செயல்படுவேன் என குறிப்பிட்டுள்ளார்.