நடிகை ரம்யா கிருஷ்ணன் வீட்டில் ரூ. 8 லட்சம் மதிப்பு நகைத் திருட்டு

திரைப்பட நடிகை ரம்யா கிருஷ்ணனின் நீலாங்கரை வீட்டில் ரூ. 8 லட்சம் மதிப்புள்ள நகைத் திருடுபோனது தொடர்பாக அவரது வீட்டில் வேலை செய்த பணிப் பெண்ணிடம் போலீஸார் விசாரணை நடத்தி வருகின்றனர்.

இது குறித்து போலீஸ் தரப்பில் தெரிவித்தது:

நீலாங்கரை ஆலிவ் கடற்கரைச் சாலையில் நடிகை ரம்யா கிருஷ்ணனின் வீடு உள்ளது. இந்த வீட்டில் ரம்யாகிருஷ்ணனின் தாயார் நித்யா (64) வசித்து வருகிறார். இந்நிலையில் அந்த வீட்டின் பீரோவில் இருந்த ரூ. 8 லட்சம் மதிப்புள்ள நகைத் திருடுபோனதாக கூறப்படுகிறது.

இது குறித்து நித்யா, நீலாங்கரை காவல் நிலையத்தில் புகார் செய்தார். அப் புகாரின் அடிப்படையில் விசாரணை செய்த போலீஸார், அவரது வீட்டில் வேலை செய்த ஆந்திர மாநிலம் குண்டூரைச் சேர்ந்த ஜோதி (30) சில நாள்களுக்கு முன்பு வேலையை விட்டு நின்றிருப்பது தெரியவந்தது.

இதையடுத்து தலைமறைவாக இருந்த ஜோதியை பிடித்து போலீஸார் வியாழக்கிழமை விசாரணை செய்தனர்.

விசாரணையில் நகையை திருடியதாக ஜோதி ஒப்புக் கொண்டாராம். இதையடுத்து போலீஸார், அவர் திருடிய நகையை கைப்பற்றும் நடவடிக்கையில் ஈடுபட்டுள்ளதாகத் தெரிகிறது.