சாகித்ய அகாதெமி விருதுகள் அறிவிப்பு: டி. செல்வராஜ் எழுதிய "தோல்' தேர்வு

2012-ம் ஆண்டுக்கான சாகித்ய அகாதெமி விருதுக்கு எழுத்தாளர் டி. செல்வராஜின் "தோல்' என்ற நாவல் உள்பட 24 படைப்புகள் தேர்வாகியுள்ளன. இதன் அதிகாரப்பூர்வ அறிவிப்பு வியாழக்கிழமை வெளியிடப்பட்டது.

சாகித்ய அகாதெமியின் நிர்வாகக் குழுக் கூட்டம் அதன் தலைவர் டாக்டர் விஸ்வநாத் பிரசாத் திவாரி தலைமையில் தில்லியில் நடைபெற்றது.

அதில் 24 மொழிகளில் பல்வேறு எழுத்தாளர்களின் படைப்புகள் பரிசீலிக்கப்பட்டு சிறந்த நாவல் ஆசிரியர்கள், கவிஞர்கள், சிறுகதைகள், சுயசரிதை ஆகிய பிரிவுகளில் விருது பெறுவோர் தேர்வு செய்யப்பட்டனர்.

அதில் "தோல்' என்ற தமிழ் நாவலை எழுதிய டி. செல்வராஜ் சாகித்ய அகாதெமி விருதுக்கு தேர்வு செய்யப்பட்டுள்ளார்.

அசாம் நாவலாசிரியர் சந்தனா கோஸ்வாமி, வங்காள எழுத்தாளர் சுப்ரதா முகோபாத்யாய, மணிப்பூரி எழுத்தாளர் ஜோதா சி. சனாஸம் உள்பட 24 மொழிகளில் சிறந்த படைப்புகளை வழங்கியவர்களுக்கு விருதுகள் வழங்கப்பட உள்ளன.

சிறுகதைப் பிரிவில் ஜெயந்த் பவார் (மராத்தி), உதய் துலங் (நேபாளம்), கௌராஹரி தாஸ் (ஓரியா), கந்தஹார் ஹன்ஸ்டா (சந்தாலி), மறைந்த எழுத்தாளர் இந்திரா வாஸ்வானி (சிந்தி), பெட்டிபோட்லா சுப்பிரமாமையா (தெலுங்கு) ஆகியோர் தேர்வு செய்யப்பட்டுள்ளனர்.

சிறந்த விமர்சகராக சந்திரகாந்த் டோபிவாலா (குஜராத்தி), சிறந்த சுயசரிதையாக ஷெபாலிகா வர்மா எழுதிய "மைதிலி' ஆகியவை தேர்வு பெற்றுள்ளன.

"அடுத்த ஆண்டு பிப்ரவரி 18-ம் தேதி தில்லியில் நடைபெறும் நிகழ்ச்சியில் விருதுகள் வழங்கப்படும்' என்று நிர்வாகக் குழு வெளியிட்ட செய்திக்குறிப்பில் தெரிவிக்கப்பட்டுள்ளது.