பிரபு-சரிதா நடிக்கும் திரைப்பட படப்பிடிப்பால் உதகையில் சுற்றுலாப்பயணிகள் உற்தசாகம்

உதகை மற்றும் சுற்றுப்பகுதிகளில் நடைபெற்றுவரும் திரைப்பட படப்பிடிப்புகளால் உள்ளூர் மக்கள் மட்டுமின்றி சுற்றுலாப்பயணிகளும் பெரும் மகிழ்ச்சி அடைந்துள்ளனர்.

உதகை மற்றும் சுற்றுப்பகுதிகளில் திரைப்பட வெளிப்புற படப்பிடிப்புகள் அதிகளவில் நடைபெறும். ஆனால், உதகையில் அரசினர் தாவரவியல் பூங்கா போன்ற பகுதிகளில் பாடல் காட்சிகள் மட்டுமே படமாக்கப்படும் என்பதால் அத்தகைய இடங்களில் மட்டுமே திரைத்துறையினரும் குவிந்து வருவர்.
ஆனால், தற்போது உதகையில் நடிகர் பிரபு, சத்யன் மற்றும் நடிகை சரிதா இணைந்து நடித்துவரும் பெயரிடப்படாத திரைப்படத்தின் வெளிப்புற படப்பிடிப்பு மாவட்டத்தின் பல்வேறு பகுதிகளிலும் நடந்து வருகிறது. இதனால், கிறித்துமஸ் மற்றும் புத்தாண்டு விடுமுறைக்காக உதகைக்கு வந்துள்ள சுற்றுலாப் பயணிகளும் பெரும் மகிழ்ச்சி அடைந்துள்ளனர்.

இதுதொடர்பாக இத்திரைப்படத்தின் இயக்குநர் புருசோத்தமன் செய்தியாளர்களிடம் தெரிவித்த தகவல்களாவன:
நான் கர்நாடக மாநிலம் மைசூர் பகுதியை சேர்ந்தவன். கன்னடத்தில் நான் இயக்கிய முதலாசலா என்ற படத்தையே தமிழில் உருவாக்கி வருகிறேன். கர்நாடக மாநிலத்தின் சூழலுக்கேற்ப உருவாக்கப்பட்ட அந்த படம் பெரும் வெற்றி பெற்றது. அதையே தமிழகத்தின் சூழலுக்கேற்ப படமாக்கி வருகிறேன். இப்படத்திற்கு இன்னும் பெயரிடப்படவில்லை. திரைப்படத்தில் கதாநாயகனாக நிதின் கண்ணன் என்பவரும், கதாநாயகியாக சம்ஸ்ருதியும் நடிக்கின்றனர். இவர்களோடு நடிகர் பிரபுவும், ரீ என்ட்ரி என்ற வகையில் நடிகை சரிதாவும் நடிக்கின்றனர்.

ஒரு குடும்பத்திற்குள் புதிதாக நுழையும் நபரால் உருவாகும் பல்வேறு பிரச்னைகள் குறித்து குடும்ப சூழலுக்கேற்ப இத்திரைப்படம் தயாராகி வருகிறது. இத்திரைப் படத்திற்கான ஒளிப்பதிவை அஜயன் வின்சென்டும், இசையை பவதாரிணியும் கவனிக்கின்றனர். நீலகிரி மாவட்டத்தின் இயற்கை சூழலை மையமாகக் கொண்டு உருவாக்கப்பட்டுவரும் இத்திரைப்படம் மார்ச் மாதத்தில் வெளியிடப்படவுள்ளதாகவும் இயக்குநர் புருசோத்தமன் தெரிவித்தார்.