பாம்பே ஜெயஸ்ரீ பெயர் ஆஸ்கர் விருதுக்குப் பரிந்துரை

சிறந்த பாடலுக்கான ஆஸ்கர் விருதுக்காக பிரபல கர்நாடக இசைப் பாடகி பாம்பே ஜெயஸ்ரீ பெயர் பரிந்துரைக்கப்பட்டுள்ளது. இது ஒரு தமிழ்ப் பாடல் என்பது குறிப்பிடத் தகுந்தது.

2013-ஆம் ஆண்டுக்கான ஆஸ்கர் விருதுகளுக்கான படங்கள் மற்றும் கலைஞர்களின் பெயர்கள் வியாழக்கிழமை அறிவிக்கப்பட்டன. சிறந்த பாடலுக்காக பாம்பே ஜெயஸ்ரீ பெயர் பரிந்துரைக்கப்பட்டுள்ளது.

"லைஃப் ஆஃப் பை' என்ற ஆங்கிலப் படத்தில் இடம்பெறும் தாலாட்டுப் பாடல் சிறந்த பாடலுக்கான ஆஸ்கர் விருதுக்குப் பரிந்துரைக்கப்பட்டுள்ளது. படத்தின் ஆரம்பத்திலும் இறுதியிலும் இப்பாட்டு இடம்பெறுகிறது.

இந்தப் பாடலை ஜெயஸ்ரீ எழுதியுள்ளார் என்பது குறிப்பிடத்தகுந்தது. இயக்குநர் ஆங் லீ அறிவுறுத்தியபடி "பையின் தாலாட்டு' என்ற பாடலை ஜெயஸ்ரீ இயற்றி, அவரே பாடியுமிருக்கிறார்.

மேலும் நால்வர் பெயர்கள் சிறந்த பாடல் விருதுக்குப் பரிந்துரைக்கப்பட்டுள்ளன. பிப்ரவரி 24-ஆம் தேதி நடைபெற இருக்கும் விருதுகள் வழங்கும் நாளன்றுதான் பரிசு பெறுபவர் பெயர் வெளியாகும்.