இயக்குநர் மணிரத்னம் வீட்டை முற்றுகையிட்ட விநியோகஸ்தர்கள்

திரைப்பட இயக்குநர் மணிரத்னம் நஷ்ட ஈடு வழங்கக் கோரி திரைப்பட விநியோகஸ்தர்கள் அவரது வீட்டை சனிக்கிழமை முற்றுகையிட்டனர். இதன் காரணமாக மணிரத்னம் வீட்டுக்கு பலத்த போலீஸ் பாதுகாப்பு போடப்பட்டுள்ளது.

இது குறித்த விவரம்: மணிரத்னம் தயாரித்து இயக்கிய கடல் திரைப்படம் கடந்த பிப்ரவரி 1-ம் தேதி வெளியிடப்பட்டது. இப்படம் வெகு ஜனங்களின் மத்தியில் போதிய வரவேற்பை பெறவில்லை எனக் கூறப்படுகிறது. எனவே இப்படத்தை வெளியிட்டதில் நஷ்டம் ஏற்பட்டுள்ளதாக திரைப்பட விநியோகஸ்தர்கள் கூறி வருகின்றனர். இதன் காரணமாக மணிரத்னத்திடம் தொடர்ந்து நஷ்டஈடு கேட்டும் வற்புறுத்தி வந்ததாகக் கூறப்படுகிறது.

இதனைத் தொடர்ந்து மணிரத்னம் வீட்டில் முற்றுகையிட விநியோகஸ்தர்கள் முடிவு செய்தனர். ராஜா அண்ணாமலைபுரம், கிரீன்வேஸ் சாலையில் மணிரத்னம் வீடு மற்றும் தயாரிப்பு நிறுவனமான மெட்ராஸ் டாக்கீஸ் அலுவலகமும் உள்ளது. மணிரத்னத்தின் வீட்டை விநியோகஸ்தர்கள் சனிக்கிழமை முற்றுகையிட்டு நஷ்டஈடு வழங்கக் கோரி போராட்டம் நடத்தினர். இதையடுத்து மணிரத்னம் வீட்டுக்கு பலத்த போலீஸ் பாதுகாப்பு போடப்பட்டுள்ளது.