59-வது தேசிய விருதுக்கு தேர்வான வித்யா பாலன், அப்புக்குட்டி

59-வது தேசிய திரைப்பட விருதுகள் டெல்லியில் இன்று (07.03.2012) அறிவிக்கப்பட்டன. வெற்றி பெற்றவர்களுக்கு மே 3-ம் தேதி இந்த விருதுகள் வழங்கப்படும். நடிகை சில்க் ஸ்மிதா வாழ்க்கை படமான 'தி டர்ட்டி பிக்சர்ஸி'ல் நடித்ததற்காக வித்யா பாலனுக்கு சிறந்த நடிகைக்கான விருது கிடைத்துள்ளது. இதேபோல் சிறந்த இந்தி படத்திற்கான விருதிற்கு 'ஐ ஆம்' என்ற படம் தேர்வு பெற்றது. சிறந்த நடிகருக்கான விருதை மராத்தி படமான 'தியோலில்' நடித்த கிரிஸ் குல்கர்னி பெறுகிறார். தமிழில் 'வாகை சூட வா' படத்திற்கு சிறந்த பிராந்திய மொழி படத்திற்கான விருது கிடைத்துள்ளது. இந்த படத்தை சற்குணம் இயக்கி உள்ளார். இவரது முதல் படம் 'களவாணி'. 'வாகை சூட வா' இவரது இரண்டாவது படமாக அமைந்தது. இந்த படத்தின் நாயகனாக விமல் நடித்தார். படத்தின் நாயகியாக இனியா அறிமுகமானார். அடுத்த தலைமுறைக்கு கல்வி அவசியம் என்பது இப்படத்தில் வலியுறுத்தப்பட்டுள்ளது. சிறந்த பொழுது போக்கு படத்துக்கான தேசிய விருது 'அழகர்சாமியின் குதிரை' என்ற தமிழ் படத்துக்கு அறிவிக்கப்பட்டுள்ளது. சிறந்த துணை நடிகருக்கான தேசிய விருது இப்படத்தில் நடித்த அப்புகுட்டிக்கு கிடைத்துள்ளது. பல படங்களில் சிறிய வேடங்களில் நடித்து வந்த அப்புக்குட்டி, இயக்குநர் சுசீந்திரன் இயக்கிய 'அழகர்சாமியின் குதிரை' படத்தில் அப்புக்குட்டி முக்கிய வேடத்தில் நடித்தார். படத்தில் குதிரைக்காரனாக வரும் அப்புக்குட்டி, காணாமல் போகும் தனது குதிரையை தேடிப்போவதும், அதை மீட்பதற்காக போராடுவதும்தான் படத்தின் திரைக்கதையாக அமைந்திருந்தது. இந்த படத்தை இயக்குநர் கௌதம் மேனனின் போட்டான் கத்தாஸ் நிறுவனம் தயாரித்தது. இப்படத்திற்கு இளையராஜா இசையமைத்தார். 'குதிக்கிற குதிக்கிற குதிரைக் குட்டி' என்று படத்தில் வரும் பாடலில் இவர் நடித்திருந்தார். இந்த பாடலை இளையராஜா பாடியிருந்தார். சிறந்த படத்தொகுப்புக்கான தேசிய விருது 'ஆரண்ய காண்டம்' என்ற தமிழ் படத்தொகுப்பாளர் பிரவீணுக்கு கிடைத்துள்ளது. ஒட்டுமொத்த இந்தியர்களையே திரும்பி பார்க்க வச்சிடுச்சுல நம்ம கோலிவுட்...! ஆஸ்கருக்கு பக்கதுல வந்திட்டோம் வாழ்த்துகள்!!