கர்நாடகாவில் பலத்த பாதுகாப்புடன் விஸ்வரூபம் ரிலீஸ்: 40 தியேட்டர்களில் திரையிடப்பட்டது

கர்நாடகம் முழுவதும் 40 தியேட்டர்களில் ‘விஸ்வரூபம்’ படம் நேற்று ரிலீஸ் செய்யப்பட்டது. பெங்களூரில் 17 தியேட்டர்களில் திரையிடப்பட்டது. அனைத்து தியேட்டர்களில் பலத்த போலீஸ் பாதுகாப்பு போடப்பட்டுள்ளது. இதுகுறித்து கர்நாடக மாநில வினியோகஸ்தர் கெங்கராஜு கூறியதாவது:-

கர்நாடகம் முழுவதும் 40 தியேட்டர்களில் ‘விஸ்வரூபம்’ ரிலீசாகி உள்ளது. அனைத்து தியேட்டர்களிலும் போலீஸ் பாதுகாப்பு அளிக்கப்பட்டுள்ளது. இந்த படத்தில் அனைத்து முஸ்லிம்களும் தீவிரவாதி அல்ல என்ற வாசகத்தை போடுமாறு முஸ்லிம் தலைவர்கள் போலீஸ் கமிஷனரிடம் வேண்டுகோள் விடுத்தனர். நாங்களும் அந்த வாசகத்தை சேர்க்க முடிவு செய்தோம்.ஆனால் டிஜிட்டல் தயாரிப்பில் படம் இருந்ததால் அந்த வாசகத்தை படத்தின் இடையில் சேர்க்க முடியவில்லை.

இவ்வாறு அவர் கூறினார்.

25-ந்தேதி வெளியாக இருந்த இந்த படம் கர்நாடக போலீசாரின் வேண்டுகோளுக்கு இணங்க நேற்றில் இருந்து ரிலீஸ் ஆனது. 26-ந்தேதி மீலாது நபி பண்டிகை மற்றும் பத்ராவதியில் நடந்த மோதல் காரணமாக இந்த படத்தை தள்ளி வைக்க போலீசார் வேண்டுகோள் விடுத்து இருந்தனர்.