விஸ்வரூபம் படம் டெல்லியில் நாளை ரிலீஸ்

விஸ்வரூபம் படத்தை தமிழ்நாட்டில் வெளியிட தடை விதிக்கப்பட்டுள்ளது. ஆனால் கேரளா, கர்நாடகா ஆகிய மாநிலங்களில் திரையிடப்பட்டு வெற்றிகரமாக ஓடிக் கொண்டிருக்கிறது. விஸ்வரூபம் படம் இந்தி மொழியிலும் தயாரிக்கப்பட்டுள்ளது.

கடந்த 25-ந் தேதி தமிழில் டெல்லியில் வெளியிடப்படுவதாக இருந்தது. ஆனால் டி.டி.எச்.மூலம் வெளியிடுவது தொடர்பாக படம் வெளியீட்டு நிறுவனத்துக்கும், தயாரிப்பு நிறுவனத்துக்கும் இடையே கருத்து வேறுபாடு ஏற்பட்டதால் திரையிடுவது தள்ளிப் போனது.

இந்த நிலையில் தமிழகத்தில் முஸ்லிம்கள் எதிர்ப்பு... அரசு தடை... கோர்ட்டு தடை என்று பல்வேறு பிரச்சினைகளை விஸ்வரூபம் சந்தித்தது. இந்தியில் விஸ்வரூபம் நாளை (வெள்ளிக்கிழமை) டெல்லியில் திரைக்கு வருகிறது. டெல்லி மற்றும் சுற்றுப்புற பகுதிகளான நொய்டா, சாஜியாபாத், குர்கான், பரீதாபாத் ஆகிய இடங்களில் 19 தியேட்டர்களில் நாளை முதல் திரையிடப்பட உள்ளது. நாடு முழுவதும் பெரும் பரபரப்பை ஏற்படுத்தி உள்ள விஸ்வரூபம் படத்தை பார்க்க மக்கள் கூட்டம் அதிகரிக்கும் என்பதால் நொய்டாவில் உள்ள ஒரு திரையரங்கில் ஒரே நாளில் 12 காட்சிகள் திரையிட ஏற்பாடு செய்யப்பட்டுள்ளது.