சிவாஜி, சாவித்ரி நடித்த பாச மலர் படம் டிஜிட்டலில் புதுப்பிப்பு: 150 தியேட்டர்களில் அடுத்த மாதம் ரிலீஸ்

சிவாஜி கணேசன், சாவித்ரி நடித்து 1961-ல் ரிலீசாகி வெற்றிகரமாக ஓடிய படம் பாசமலர்' இருவரும் அண்ணன், தங்கை கேரக்டரில் நடித்து இருந்தனர். பீம்சிங் இயக்கினார்.

இந்த படத்தில் இடம் பெற்ற மலர்களை போல் தங்கை உறங்குகிறாள், மயங்குகிறாள் ஒரு மாது, பாட்டொன்று கேட்டேன் பரவசமானேன், எங்களுக்கும் காலம் வரும், யார் யார் அவர் யாரோ, வாராயென் தோழி வாராயோ, மலர்ந்தும் மலராத பாதி மலர் போல போன்ற பாடல்கள் பட்டி தொட்டியெங்கும் அப்போது கலக்கின.

தியேட்டர்களில் 182 நாட்கள் இப்படம் ஓடியது. சிறந்த படத்துக்கான தேசிய விருதும் கிடைத்தது. பாச மலர் படம் தற்போது பல லட்சம் செலவில் டிஜிட்டலில் புதுப்பிக்கப்பட்டு மீண்டும் ரிலீஸ் செய்யப்படுகிறது. சினிமாஸ் கோப் மற்றும் கியூப் தொழில் நுட்பத்திலும் இப்படம் மாற்றப்பட்டு உள்ளது.

தமிழ்நாடு முழுவதும் 150 தியேட்டர்களில் அடுத்த மாதம் (ஏப்ரல்) இப்படத்தை வெற்றி சினி ஆர்ட்ஸ் சார்பில் கே.வி.பி. பூமிநாதன் வெளியிடுகிறார்.