100 ஆண்டு சினிமாவில் சிறந்த நட்சத்திரங்களாக கமல்- சாவித்திரி, ஸ்ரீதேவி தேர்வு- சிறந்த படம் நாயகன்

இந்திய சினிமாவின் 100 ஆண்டு விழா கொண்டாட்டத்துக்கு ஏற்பாடு நடக்கிறது. சென்னையில் நடைபெறும் இவ்விழாவில் அமிதாப்பச்சன், ரஜினி, கமல், மோகன்லால், மம்முட்டி, சீரஞ்சிவி உள்ளிட்டோர் பங்கேற்கின்றனர்.

இதற்கிடையில் 100 ஆண்டு சினிமாவில் சிறந்த நடிகர், நடிகைகளை தேர்வு செய்கின்றனர். இண்டர்நெட் மூலம் வாக்கெடுப்பு நடத்தப்பட்டது. ரசிகர்களே ஓட்டு போட்டு தேர்வு செய்கிறார்கள். இதில் சிறந்த நடிகருக்கான முதல் இடம் தெலுங்கு நடிகர் என்.டி.ராமராவுக்கு கிடைத்தது. 53 சதவீதம் பேர் அவருக்கு வாக்களித்து உள்ளனர்.

ராமர், கிருஷ்ணர், கர்ணன், அர்ஜுனன், திருப்பதி வெங்கடாஜலபதி போன்றதோர் கேரக்டர்களில் நடித்து அதிக அளவு ரசிகர்களை பெற்றுள்ளதாக கருத்து கணிப்பில் கூறப்பட்டு உள்ளது. கடவுள் வேடங்களில் என்.டி.ராமராவுக்கு கச்சிதமாக பொருந்தியிருப்பதாகவும் தெரிவித்துள்ளனர்.

சிறந்த நடிகருக்கான இரண்டாவது இடம் கமலஹாசனுக்கு கிடைத்துள்ளது. இவர் 44 சதவீதம் பெற்றுள்ளார். மலையாள நடிகர் மோகன்லால், கன்னட நடிகர் ராஜ்குமார் இருவரும் தலா 1 சதவீதம் வாக்குகள் பெற்று 3-வது இடத்தை பெற்றுள்ளனர்.

சிறந்த நடிகையாக ஸ்ரீதேவி தேர்வாகியுள்ளார். இவர் தமிழ், தெலுங்கு, இந்திப்படங்களில் முன்னணி கதாநாயகியாக இருந்தார். ரசிகர்களின் கனவுக்கன்னியாகவும் வர்ணிக்கப்பட்டார். இந்தியா முழுவதும் ரசிகர்களை பெற்றார். ஸ்ரீதேவி 39 சதவீதம் வாக்குகள் பெற்று முதல் இடத்தை பெற்றார். இரண்டாவது இடத்தை மாதுரி தீட்சித் பெற்றார். இவருக்கு 16 சதவீதம் வாக்குகள் கிடைத்துள்ளன. மூன்றாம் இடம் சாவித்திரிக்கு கிடைத்துள்ளது. இவருக்கு 12 சதவீதம் பேர் வாக்களித்து உள்ளனர். நான்காவது இடத்தை ஐஸ்வர்யாராய் பெற்றார். இவருக்கு 8 சதவீதம் வாக்குகள் கிடைத்துள்ளன.

சிறந்த படமாக கமல் நடித்த நாயகன் தேர்வாகி உள்ளது. இப்படத்துக்கு ஆதரவாக 32 சதவீதம் பேர் வாக்களித்து உள்ளனர். இரண்டாவது இடம் இந்திப்படமான ஷோலேவுக்கு கிடைத்திருக்கிறது. 24 சதவீதம் பேர் வாக்களித்து உள்ளனர். இந்தப்படத்தில் அமிதாப்பச்சன், தர்மேந்திரா இணைந்து நடித்திருந்தனர். இந்தியா முழுவதும் வெற்றிகரமாக ஓடியது. சிறந்த இயக்குனராக மணிரத்னம் தேர்வாகியுள்ளார். இவருக்கு 29 சதவீதம் வாக்குகள் கிடைத்துள்ளன.