ஸ்ரீதேவி நடித்த ‘இங்கிலிஷ் விங்கிலிஷ்’ திரைப்படம் ஜெர்மன்-ஹாங்காங் மொழிகளில் வெளியாகிறது

நடிகை ஸ்ரீதேவி நடித்து சமீபத்தில் வெளிவந்த ‘இங்கிலிஷ் விங்கிலிஷ்’ என்ற திரைப்படம் ஒரு வெற்றிப்படமாக அமைந்தது நாம் அறிந்ததே. ஆங்கில மொழி தெரியாத ஒரு நடுத்தர வர்க்கத்துப் பெண், தனக்குள்ள மொழி தடைகளைத் தாண்டி அம்மொழியில் புலமை பெறுவதாக திரைக்கதை அமைக்கப்பட்டு இருந்தது.

இப்படம், மொழியின் எல்லை மட்டுமின்றி, நாட்டின் எல்லைகளையும் தாண்டி வெளியிடப்படப் போவதாக அப்படத்தின் தயாரிப்பு நிறுவனமான ஈராஸ் இன்டர்நேஷனல் நிறுவனம் தெரிவித்துள்ளது. தற்பொழுது இந்தப்படம் ஜெர்மன் மொழியில் மொழிமாற்றம் செய்யப்பட்டு 20 பிரிண்ட்டுகள் எடுக்கப்பட்டு, மே மாதம் திரைக்கு வரப்போவதாக அந்நிறுவனம் கூறியுள்ளது.

மேலும் இந்த வார இறுதியில், ஹாங்காங் நாட்டிலும், அவர்களது மொழியில் வசனப் பதிவுகளுடன் வெளியிட இருப்பதாகவும், ஒரே நாளில் 29 காட்சிகள் திரையிடப்படும் எனவும், சிவப்புக் கம்பள வரவேற்பு எனக் கருதப்படும் டைரக்டர்ஸ் கிளப்பிலும் இப்படம் காட்சிக்கு வருகிறது என்றும் அந்நிறுவனம் தெரிவித்தது.

ஆங்கிலம் பேசாத மக்களுக்கு, இந்தப் படம் ஒரு நல்ல மன தைரியத்தை பெற்றுத்தரும் என்றும், இப்படம் மேலும் பல மொழிகளில் வரவேண்டும் என்றும், இதில் நடித்த ஸ்ரீதேவி கருத்து தெரிவித்தார்.

இவ்வாறு உலக மொழிகளில் தனது படம் வெளிவருவது மகிழ்ச்சி அளிப்பதாக அப்படத்தின் இயக்குனர் கௌரி ஷிண்டே தெரிவித்தார்.