காமெடியும் குணசித்திரமும் அஸ்வின் ராஜா ஆசை

சென்னை : ‘கும்கி’யில் காமெடி வேடத்தில் நடித்துள்ள அஸ்வின்ராஜா, நிருபர்களிடம் கூறியதாவது: ‘காதல் வசமாகி’யில் முகம் காட்டினேன் என்றாலும், ‘பாஸ் என்கிற பாஸ்கரன்’ எனது அறிமுகப் படமாக அமைந்தது. தொடர்ந்து பல படங்களில் காமெடி செய்தேன். ‘கும்கி’ என்னை அதிக அளவில் ரசிகர்களிடம் சேர்த்துள்ளது. யானையுடன் நடித்தது மறக்க முடியாத அனுபவம். இதில் நடித்த பிறகுதான் இயல்பான காமெடி செய்வது எப்படி என்று தெரிந்துகொண்டேன்.

இதற்கு இயக்குனர் பிரபு சாலமனும் தம்பி ராமையாவும்தான் காரணம். கவுண்டமணி, செந்தில் காம்பினேஷன் போல தம்பி ராமையாவையும் என்னையும் ரசிக்கிறார்கள் என்று கேள்விப்பட்டபோது மகிழ்ச்சியாக இருந்தது. ‘நெடுஞ்சாலை’, ‘வெயிலோடு விளையாடி’, ‘சில்லுன்னு ஒரு சந்திப்பு’, ‘தில்லு முல்லு’ படங்களில் நடிக்கிறேன். காமெடி மற்றும் குணச்சித்திர வேடங்களில் மட்டுமே நடிக்க விரும்புகிறேன்.