சிறு படங்களுக்கு பெரிய தயாரிப்பாளர்கள் உதவ வேண்டும் : பார்த்திபன் வேண்டுகோள்

சென்னை: விஜய் சேதுபதி, காயத்ரி நடித்த ‘நடுவுல கொஞ்சம் பக்கத்த காணோம்’ படத்தின் 50-வது நாள் வெற்றிவிழா ராணி சீதை ஹாலில் நடந்தது. இயக்குனர் கே.வி.ஆனந்த் படத்தில் பணியாற்றியவர்களுக்கு நினைவு பரிசு வழங்கினார். ‘அட்டகத்தி’ இயக்குனர் ரஞ்சித், ‘ஆரோகணம்’ இயக்குனர் லட்சுமி ராமகிருஷ்ணன், ‘ராட்டினம்’ இயக்குனர் தங்கசாமி, ‘சாட்டை’ இயக்குனர் அன்பழகன் ஆகியோர் கவுரவிக்கப்பட்டனர். விழாவில் இயக்குனர் பார்த்திபன் பேசியதாவது: கடந்த ஆண்டு சிறிய படங்கள்தான் அதிகமாக வெற்றி பெற்றுள்ளது. இது ஆரோக்கியமான விஷயம். முன்பெல்லாம் சின்ன மீனைபோட்டு பெரிய மீனை பிடிப்பார்கள். இப்போது சின்ன மீனுக்கு நிறைய உணவு போட்டு பெரிய மீனாக்கி விடுகிறார்கள். கடந்த ஆண்டு வெற்றி பெற்ற சிறு படங்கள் அனைத்துக்கும் பெரிய அளவில் விளம்பரம் செய்யப்பட்டது. அதனால்தான் வெற்றி பெற முடிந்தது. பெரிய தயாரிப்பாளர்கள் சிறிய படங்களுக்கு ஆதரவு கொடுத்து உதவ வேண்டும். சிறிய படங்களை தயாரிக்கவும் முன்வர வேண்டும். இவ்வாறு பார்த்திபன் கூறினார். விழாவில் விமல், தயாரிப்பாளர்கள் சிவஸ்ரீ சீனிவாசன், யுடிவி தனஞ்செயன், கேயார், டி.சிவா உட்பட பலர் வாழ்த்தி பேசினர். தயாரிப்பாளர்கள் ஜேஎஸ்கே பிலிம் சதீஷ்குமார், வி.எஸ்.ராஜ்குமார் வரவேற்றனர். இயக்குனர் பாலாஜி தரணிதரன் நன்றி கூறினார்.