விஸ்வரூபம் பிரச்னையில் சமரசம் ஏற்பட வேண்டும்: ரஜினிகாந்த் வேண்டுகோள்

"விஸ்வரூபம்' படம் தொடர்பான பிரச்னையில் சமரசம் ஏற்பட வேண்டும் என்று நடிகர் ரஜினிகாந்த் கேட்டுக் கொண்டுள்ளார். கதைக்கு பாதிப்பு வராத வகையில் சரிசெய்து படத்தை வெளியிட கமலுக்கு உறுதுணையாக இருக்க முஸ்லிம் அமைப்புகளுக்கு அவர் அழைப்பு விடுத்துள்ளார்.

இது குறித்து அவர் வெள்ளிக்கிழமை வெளியிட்ட அறிக்கை:

"விஸ்வரூபம்' படம் தொடர்பாக கடந்த சில நாள்களாக எழுந்துள்ள பிரச்னைகளை அறிந்து மிகவும் வேதனைப்படுகிறேன். கமல்ஹாசன் என் 40 ஆண்டு கால நண்பர். யாருடைய மனதையும் புண்படுத்தும் படியாக நடந்து கொள்ளாதவர் என்பதை நன்கு அறிவேன். "விஸ்வரூபம்' படம் தணிக்கையான பிறகு தியேட்டர்களில் வெளியிடுவதற்கு முன்பே, முஸ்லிம் சகோதரர்களின் வேண்டுகோளை ஏற்று அவர்களின் பார்வைக்கு திரையிட்டதிலிருந்தே முஸ்லிம் சமூகத்தின் மீது கமல் கொண்டுள்ள மதிப்பும், மரியாதையும் தெரிகிறது.

மேலும் இந்தப் படத்தைத் தயாரிக்க கமல்ஹாசன் என்னென்ன சிரமங்களை அனுபவித்திருக்கிறார் என்பதை அறியும்போது என் மனம் கலங்குகிறது. அவர் ஒரு சாதாரண கலைஞன் அல்ல. தமிழ் சினிமாவை உலக அளவில் கொண்டு செல்வதற்கு ஒரு காரணமாக உள்ள மகா கலைஞன். இதையெல்லாம் மனதில் கொண்டு இந்தப் படத்தை முழுமையாகத் தடை செய்ய வேண்டும் என்ற கருத்திலிருந்து மாறி, கமல்ஹாசன் அமெரிக்காவில் இருந்து வந்த பிறகு அவருடன் கலந்து பேசி, கதைக்கு பாதிப்பு வராத வகையில் சரி செய்து படத்தை வெளியிட உறுதுணையாக இருக்குமாறு மீலாது நபி வாழ்த்துகளுடன் முஸ்லிம் சகோதரர்களை கேட்டுக் கொள்கிறேன் என அவர் கூறியுள்ளார்.