நயன்தாரா மறுத்த வேடத்தை ஏற்பாரா பிரியாமணி?

நயன்தாரா மறுத்த வேடத் தில் பிரியாமணி நடிப்பாரா என்பது பற்றி பேச்சு நடக்கிறது. பாலிவுட் ஹீரோ ஷாருக்கான் நடிக்கும் இந்தி படம் ‘சென்னை எக்ஸ்பிரஸ்’. தீபிகா படுகோன் ஹீரோயின். இப்படத்தில் ஷாருக்கானுடன் குத்துப்பாடலுக்கு ஆட நயன்தாராவை அணுகினார் இயக்குனர் ரோஹத் ஷெட்டி. ஆனால், இந்தி படத்தில் அறிமுகமானால் ஹீரோயினாக அறிமுகமாவது என்று நயன்தாரா முடிவு செய்துள்ளார். எனவே குத்து பாடலுக்கு ஆட மறுத்துவிட்டார். இதையடுத்து வேறு ஹீரோயினை தேடிக்கொண்டிருக்கிறார்கள். தற்போது இந்த பாடல் காட்சிக்கு ஆட பிரியாமணிக்கு வாய்ப்பு வந்திருப்பதாக தெரிகிறது.

இதுபற்றி இயக்குனர் தரப்பில் கூறும்போது,‘இப்பாடலுக்கு ஆட பிரியாமணியிடம் கேட்க உள்ளோம். அவர் நிச்சயம் நடிப்பார்’ என்றனர். ‘இயக்குனர் தரப்பில் அணுகினார்களா?’ என்று பிரியாமணியிடம் கேட்டபோது அதை உறுதி செய்ய மறுத்தார். ‘இதுபற்றி இப்போது பதில் சொல்வது சரியாக இருக்காது. இந்த வாய்ப்பு வருவதற்கான சூழல்எழுந்துள்ளது. ஆனால் அதில் நடிப்பதுபற்றி இன்னும் பேசி முடிவு செய்யவில்லை. நடிப்பது உறுதியான பிறகுதான் பதில் சொல்ல முடியும்’ என்றார். மும்பையில் இருந்து ராமேஸ்வரத்துக்கு ஹீரோ ஷாருக் வருவதுபோன்ற கதை என்பதால் இந்த பாடலுக்கு தென்னிந்திய நடிகை நடித்தால்தான் பொருத்தமாக இருக்கும் என்று இயக்குனர் முடிவு செய்துள்ளாராம்.