மாற்றானின் இன்ஸ்பிரேஷன் எது? - கே.வி.ஆனந்த் சொல்கிறார்

கே.வி.ஆனந்தும், அவரது கதை இலாகா சுபாவும் எவ்வளவு புத்திசாலித்தனமாகச் சுட்டாலும் இணைய சூரப்புலிகள் ஒ‌ரி‌ஜினல் படம் எது என்பதை கண்டு பிடித்துவிடுகிறார்கள். கே.வி.ஆனந்தின் மாற்றான் படம்கூட தாய்லாந்த் அலோன் படத்தின் காப்பி என்றொரு பேச்சிருக்கிறது. பிரஸ்மீட்டில் இந்த‌க் கேள்வியை வைத்தே குழப்பியடித்தார்கள் நிருபர்கள். இந்நிலையில் கே.வி.ஆனந்தே மாற்றான் படம் தாய்லாந்தில் வாழ்ந்த ஒட்டிப் பிறந்த இரட்டை‌ச் சகோத‌ரிகள் கதை என்று தெ‌ரிவித்திருக்கிறார்.

அடடா உண்மையை உடனே சொல்லிட்டாங்களே, ஜென்டில்மேன். அப்படிதானே நினைக்கிறீங்க. அதுதான் இல்லை. தாய்லாந்து படமான அலோன் ஹாரர் படம். மாற்றான் காமெடியும் ஆக்சனும் சேர்ந்தது. உண்மையில் இந்தப் படத்தை பாபி ஃபேரலி, பீட்டர் பேரலி இயக்கிய ஸ்டக் ஆன் யு என்ற படத்தின் இன்ஸ்பிரேஷனில் எடுத்திருக்கிறார்கள். மேட் டேமனும், கிரேக் கின்னரும் நடித்த இந்தப் படத்தில் மேட் டேமனுக்கு ஷார்ட் ஹேர். கின்னருக்கு முடி அதிகம். இதே கெட்டப்பை மாற்றானிலும் நீங்கள் பார்க்கலாம். காமெடி காட்சிகளை அதிகம் இந்தப் படத்திலிருந்தே சுட்டிருப்பதாக தகவல்கள் தெ‌ரிவிக்கின்றன.

பாபியும், பீட்டரும் ‌ஜிம் கே‌ரியை வைத்து டம் அண்ட் டம்பர் படத்தை இயக்கியதன் மூலம் திரையுலகுக்குள் பிரவேசித்தவர்கள். தாய்லாந்து, இரட்டை‌ச் சகோத‌ரிகள் என்று கதைவிட்டால் ஹாலிவுட், ஸ்டக் ஆன் யு பக்கம் பார்வை திரும்பாது.

ஆனால் இதனாலெல்லாம் ஏமாற்ற முடியுமா என்ன.