ஆள் அனுப்பி மிரட்டுறாங்க - விஜய் தந்தை மீது புகார்

கள்ளத்துப்பாக்கி, துப்பாக்கி பட தலைப்புக்கான போட்டி அடுத்த கட்டத்தை எட்டியிருக்கிறது. இதன் முன் கதைச்சுருக்கம் தமிழகத்துக்கு அத்துப்படி என்றாலும் ஒரு சின்ன ஃப்ளாஷ்பேக்.

கள்ளத்துப்பாக்கி என்ற படத்தை ரவி தேவன் என்பவர் 2009 முதலே எடுத்து வருகிறார். இந்நிலையில் முருகதாஸ் இயக்கத்தில், தாணு தயா‌ரிப்பில் விஜய் நடித்தப் படத்துக்கு துப்பாக்கி என்று பெயர் வைத்தனர். கள்ளத்துப்பாக்கி... துப்பாக்கி... பெயர் குழப்பம் வரும் என ரவி தேவன் தயா‌ரிப்பாளர்கள் சங்கத்தில் அப்போதே புகார் செய்தார். நோ ரெஸ்பான்ஸ். இதனைத் தொடர்ந்து கோர்ட்டுக்கு சென்று துப்பாக்கி என்ற டைட்டிலை பயன்படுத்த இடைக்கால‌த் தடை வாங்கினார். இந்த வழக்கு இன்னும் நிலுவையில் உள்ளது.

இந்நிலையில் போலீஸ் கமிஷனர் அலுவலகத்தில் புதிய புகார் ஒன்றை ரவி தேவன் தந்திருக்கிறார். அதில் தாணுவும், எஸ்ஏ.சந்திரசேகரனும் ஆள் வைத்தும் தொலைபேசி மூலமாகவும் கொலை மிரட்டல் விடுப்பதாக தெ‌ரிவித்துள்ளார். தனக்கும் தனது குடும்பத்துக்கும் தகுந்த பாதுகாப்பு தரும்படியும் அதில் அவர் கேட்டுள்ளார்.