சிங்கத்தை சீண்டுகிறதா சேட்டை?

இலக்கியவாதிகளை சினிமாவில் கறிவேப்பிலை அளவுக்குக்கூட பயன்படுத்துவதில்லை. யுத்தம் செய் படத்தில் குத்துப் பாடலில் சில நொடிகள் வருவார் சாரு நிவேதிதா. அதுவும் அவரது கை விரல்கள் மட்டும். ஜேஜே படத்தில் சுந்தர ராமசாமியின் ஜேஜே சில குறிப்புகள் நாவலை ஹீரோ வைத்திருப்பார். இதுதான் தமிழ் சினிமாவின் இலக்கிய பங்களிப்பு.

டெல்லி பெல்லி படத்தை கண்ணன் சேட்டை என்ற பெய‌ரில் இயக்கி வருகிறார் அல்லவா. அதில் ஆர்யா ஜேகே என்ற பத்தி‌ரிகையாளராக வருகிறார். தமிழ்நாட்டில் ஜேகே என்றால் அது ஜெயகாந்தன். இந்தப் படத்திலும் ஜேகே-யின் வி‌ரிவு ஜெயகாந்தன்.

கன்னத்தில் முத்தமிட்டால் படத்தில் மாதவனின் கதாபாத்திரம் ஜெயகாந்தனை மனதில் வைத்து உருவாக்கப்பட்டிருக்கும். தென்றலிலும்கூட பார்த்திபனின் கதாபாத்திரத்துக்கு இன்ஸ்பிரேஷன் ஜெயகாந்தன்தான். இரண்டு படங்களும் ஜெயகாந்தன் அபிமானிகளிடம் அடி வாங்கியது.

முதலிரண்டு படங்களில் வேறு பெயராவது வைத்திருந்தார்கள். சேட்டையில் ஜேகே என்றே வெளிப்படையாக வைத்திருக்கிறார்கள். ஜெயகாந்தனை பிரதியெடுப்பது என்பது தஞ்சை பெ‌ரிய கோவிலை மினியேச்சர் செய்வது மாதி‌ரி. ஒட்டாது. கண்ணன் சார் கண்டனங்கள் காத்திருக்கு.