சீனா: சிறார்கள் காப்பகத்தில் தீ; 7 குழந்தைகள் பலி

சீனாவில் அனாதைச் சிறார்களின் காப்பகமொன்றில் பரவிய தீயினால் குறைந்தது ஏழு சிறார்கள் பலியாகியுள்ளனர்.
தொடர்புடைய விடயங்கள்

உலகம்

சீனாவின் வடக்கே ஹெனான் மாகாணத்தில், உள்ளூர் நேரப்படி காலை 08:30 மணியளவில் தனியார் சிறார் இல்லமொன்றில் பரவிய தீ இரு மணிநேரத்தில் கட்டுபடுத்தப்பட்டு விட்டதாக அரச ஊடகம் தெரிவித்துள்ளது.

நான்கு சிறார்கள் தீயில் கருகி சம்பவ இடத்திலேயே பலியாகியுள்ளனர். மேலும் மூன்று சிறார்கள் மருத்துவமனைக்கு கொண்டுசெல்லப்படும் வழியிலேயே உயிரிழந்துள்ளனர்.

தீக்கான காரணம் இன்னும் உறுதியாகத் தெரியவில்லை.

தாய் தந்தையர் இல்லாத மற்றும் கைவிடப்பட்டக் குழந்தைகளை பெண்ணொருவர் இந்த வீட்டில் வைத்துப் பராமரித்துவந்துள்ளார்.

தெருவோரம் வியாபாரம் நடத்தி பிழைத்துவந்த இந்தப் பெண் கடந்த 20 ஆண்டுகளுக்கும் மேலாக பெருமளவிலான குழந்தைகளை தனது வீட்டில் பராமரித்துவந்துள்ளார்.

தீ பரவிய போது வீட்டில் எத்தனை சிறார்கள் இருந்துள்ளார்கள், எத்தனைபேர் காயமடைந்துள்ளனர் என்பது போன்ற தகவல்கள் இன்னும் தெரியவரவில்லை.

ஹெனான் மாகாணத்தில் சிறார்கள் சம்பந்தப்பட்ட பல சம்பவங்கள் அண்மைய மாதங்களில் நடந்துள்ளன.

கடந்த டிசம்பர் மாதம் கத்தி வைத்திருந்த நபர் ஒருவரினால் இதே பிரதேசத்தில் பள்ளிக்கூடமொன்றில் இருந்த 23 சிறார்கள் காயப்படுத்தப்பட்டமை குறிப்பிடத்தக்கது.