`பள்ளியில் செக்ஸ் கல்வி தேவையில்லை'

உயர்நிலைப் பள்ளிக்கூட பாடத்திட்டத்தில் பாலியல் கல்வி இடம்பெறத் தேவையில்லை என்றும், மேல்நிலைக் கல்வியில் உயிரியல் பாடத்தில் ஏதாவது ஒரு பகுதியாக பாலியல் கல்வி இடம்பெறச் செய்யலாம் என்றும் அதுபற்றி ஆய்வு செய்த நாடாளுமன்றக் குழு தெரிவித்துள்ளது.

மாநிலங்களவை மனுக்கள் குழு அண்மையில் வெளியிட்டுள்ள அறிக்கையில், பள்ளிகளில் பாலியல் கல்வி இடம்பெறக்கூடாது என்று குறிப்பிட்டுள்ளது.

மேலும் பள்ளி மாணவர்களிடத்தில் திருமணத்திற்கு முன் பாலியல் உறவு என்பது முறையற்ற, உடல்நலத்தைப் பாதிக்கக்கூடியது என்ற தகவலை அறிவுறுத்துதல் அவசியம் என்று அக்குழு கூறியுள்ளது.

மூத்த பாஜக தலைவர் வெங்கையா நாயுடு தலைமையிலான இக்குழு, திருமணத்தை தவிர்த்து, பாலுறவு வைத்துக் கொள்வது சமுதாய விதிமுறைகளுக்கு எதிரானது என்பதை மாணவர்கள் தெரிந்து கொள்ளச் செய்வது அவசியம் என்றும் தெரிவித்துள்ளது.