கடந்த 10 ஆண்டுகளில் எய்ட்ஸ் பாதிப்பு 57 சதவீதம் குறைவு

இந்தியாவில் கடந்த 10 ஆண்டுகளில் எய்ட்ஸ் பாதிப்பு 57 சதவீதம் குறைந்துள்ளது என தேசிய எய்ட்ஸ் கட்டுப்பாட்டு மையம் தெரிவித்துள்ளது. உலக எய்ட்ஸ் தினம் நேற்று அனுசரிக்கப்பட்டது. இதை முன்னிட்டு எய்ட்ஸ் பாதிப்பு புள்ளி விவரங்கள் அறிக்கை வெளியிடப்பட்டது. 2011ம் ஆண்டு கணக்கெடுப்புப்படி எச்.ஐ.வி பாதிப்புடன் வாழ்பவர்களின் எண்ணிக்கை 20 லட்சத்து 88 ஆயிரத்து 642. எய்ட்ஸ் தொடர்பான நோய்களால் கடந்த ஆண்டு 1.48 லட்சம் பேர் இறந்தனர். இவர்களில் 7 சதவீதம் பேர் குழந்தைகள்.

எய்ட்ஸ் பாதிப்பு தொடர்ந்து குறைந்து வருவது கணக்கெடுப்பில் தெரியவந்துள்ளது. கடந்த 2001ம் ஆண்டில் 0.41 சதவீதமாக இருந்த எய்ட்ஸ் பாதிப்பு கடந்த 2006ம் ஆண்டில் 0.35 சதவீதமாகவும், கடந்த ஆண்டில் 0.27 சதவீதமாகவும் குறைந்துள்ளது. அரசு மருத்துவமனைகளில் எய்ட்ஸ் நோயாளிகளுக்கு வழங்கப்படும் இலவச ஏ.ஆர்.டி(ஆன்ட்டி ரெட்ரோவைரல் தெரபி) சிகிச்சை மூலம் 1.5 லட்சம் பேரின் உயிர் காப்பாற்றப்பட்டுள்ளது என மத்திய சுகாதாரத்துறை அமைச்சர் குலாம் நபி ஆசாத் வெளியிட்ட அறிக்கையில் தெரிவிக்கப்பட்டுள்ளது.

கடந்த 2000ம் ஆண்டில் இந்தியாவில் 2.74 லட்சம் பேர் எய்ட்ஸ் பாதிப்புக்கு ஆளாயினர். ஆனால் கடந்த 2011ம் ஆண்டில் 1.16 லட்சம் பேர் மட்டுமே எய்ட்ஸ் பாதிப்புக்கு ஆளாயினர். கடந்த 10 ஆண்டுகளில் எய்ட்ஸ் பாதிப்பு 57 சதவீதம் குறைந்துள்ளது தெரியவந்துள்ளது. எய்ட்ஸ் நோயாளிகள் அதிகம் இருந்த மாநிலங்களில் இதே காலத்தில் எய்ட்ஸ் பாதிப்பு 76 சதவீதமாக குறைந்துள்ளது கண்டறியப்பட்டுள்ளது. ஆனால், எய்ட்ஸ் பாதிப்பு குறைவாக இருந்த மாநிலங்களில் எய்ட்ஸ் பாதிப்பு அதிகரித்துள்ளதும் கண்டறியப்பட்டுள்ளது. இந்த ஆண்டில் எடுக்கப்பட்ட கணக்கெடுப்பில், எய்ட்ஸ் பாதிப்பு, பலி எண்ணிக்கை ஆகியவை தொடர்ந்து குறைந்துள்ளது கண்டறியப்பட்டுள்ளது.