ஏ.ஆர். முருகதாசின் ஆசையும், கனவும்!

அஜித் - விஷ்ணுவர்தன் படத்தின் தலைப்பு என்ன, அஜித் என்ன கெட்டப்பில் நடிக்கிறார் என்ற தகவலே வெளிவராத நிலையில், அஜித்தின் அடுத்த படம் குறித்த தகவல்கள் இணையத்தினை ஆக்கிரமித்து கொண்டிருக்கின்றன.

விஷ்ணுவர்தன் படத்தினை முடித்துவிட்டு சிறுத்தை சிவா இயக்கும் படத்தில் நடிக்க இருக்கிறார் அஜித். இப்படத்தில் அஜித் ஜோடியாக தமன்னா நடிக்க, அஜித்திற்கு தம்பிகளாக 4 பேர் நடிக்க இருப்பதாகவும் தகவல்கள் வெளியாகியுள்ளன. ஆனால் அதிகாரப்பூர்வமாக இன்னும் எதுவும் அறிவிக்கவில்லை.

சிறுத்தை சிவா படத்தினை முடித்து விட்டு ஏ.ஆர்.முருகதாஸ் இயக்கத்தில் அஜித் நடிக்க இருப்பதாகவும், படத்திற்கு 'ரெட்டைதல' என்று பெயரிட்டு இருப்பதாகவும் செய்திகள் வெளிவந்தன.

இதனை ஏ.ஆர்.முருகதாஸ் மறுத்து இருக்கிறார். இது குறித்து ஏ.ஆர்.முருகதாஸ் " நானும் அந்த செய்திகளை படித்தேன். சரி நல்ல விஷயம்தானே என்று பதில் ஏதும் சொல்லவில்லை. ஆனால் அவை எல்லாமே யூகத்தின் அடிப்படையிலான செய்திகள்தான் உண்மையில்லை.

அஜித்துடன் ஒரு படம் பண்ண வேண்டும் என்ற ஆசை எனக்கு உண்டு. அவருக்கும் உண்டு. ஆனால் அதற்கான நேரம் இன்னும் வரவில்லை. வரும்போது இணைந்து பணியாற்றுவோம். நான் இப்போது 'துப்பாக்கி' இந்தி ரீமேக்கில் பிஸியாக இருக்கிறேன்.

அக்ஷய்குமார், சோனாக்ஷி சின்ஹா நடிக்கிறார்கள். இதற்கே எனக்கு ஒரு வருடம் ஆகிவிடும், பொதுவாக நான் பெரிய பட்ஜெட்டில் ஆக்ஷன் படங்கள்தான் இயக்குகிறேன் என்ற குற்றச்சாட்டு இருக்கிறது. அச்செய்தியினை பொய்யாக்கும் விதத்தில் சிறிய பட்ஜெட்டில் புதுமுகங்களை வைத்து ஒரு காதல் படம் எடுக்கும் எண்ணமும் இருக்கிறது. கமல் சாரை வைத்து உலக தரத்தில் ஒரு படத்தை இயக்க வேண்டும் என்பது வாழ்நாள் கனவு." என்று தெரிவித்து இருக்கிறார்.