ஜாங்கோ அன்செயின்ட் - வில் ஸ்மித் விலகிய காரணம்.

குயென்டின் டரன்டினோவின் ஜாங்கோ அன்செயின்ட் பல நாடுகளில் வெளியாகி அவ‌ரின் இதுவரை வெளியான எந்தப் படத்தையும்விட அதிகமாக வசூலித்துவிட்டது. ஆனால் இந்தியாவிலும், சைனாவிலும் தாமதமாக வெளியாகிறது. இந்நிலையில் வில் ஸ்மித் படத்தில் நடிக்காததற்கான காரணத்தை தெ‌ரிவித்துள்ளார்.

டைட்டில் கதாபாத்திரம் ஜாங்கோவாக நடிக்க டரன்டினோவின் முதல் சாய்ஸ் வில் ஸ்மித். இருவரும் பேச்சுவார்த்தை நடத்தினர். திடீரென்று வில் ஸ்மித் விலக, ஜேமி ஃபாக்ஸ் ஒப்பந்தமானார். இந்த விலகல் பல்வேறு யூகங்களை கிளப்பியது.

வில் ஸ்மித் நடித்த கதாபாத்திரங்களை விட பலமடங்கு கொடூரமானது ஜாங்கோ கதாபாத்திரம், அதுதான் அவர் நடிக்கவில்லை என்பது ஒரு காரணம். எம்ஐபி 3 படத்திற்கு கால்ஷீட் தந்திருந்தார் மேலும் ஆஃப்டர் எர்த் படத்தை கமிட் செய்திருந்தார், அதுதான் இந்த விலகல் என்பது இன்னொரு காரணம். ஆனால் உண்மையான காரணத்தை தற்போது ஸ்மித் வெளியிட்டிருக்கிறார்.

ஜாங்கோ அன்செயின்ட் படத்தில் ஜாங்கோ மட்டுமே முக்கியமான கதாபாத்திரம் அல்ல, அதனை டாமினேட் செய்யும் பல கதாபாத்திரங்கள் - முக்கியமாக கிறிஸ்டோப் வால்ட்சுக்கு ஆஸ்கர் பெற்றுத் தந்த ஜெர்மன் டாக்டர் கதாபாத்திரம் - இருந்ததால்தான் அதில் நடிக்கவில்லை என தெ‌ரிவித்துள்ளார்.