மீரா ஆட்டத்துக்கு தடை போட்ட சங்கம்.

கலை நிகழ்ச்சிக்கு லேட்டாக வந்த மீரா ஜாஸ்மினை நடிகர் சங்கம் ஓரம்கட்டியது. மலையாள நடிகர் சங்கம் சார்பில் சார்ஜா மற்றும் கொச்சியில் சமீபத்தில் கலை நிகழ்ச்சிகள் நடத்தப்பட்டது. இதில் மம்மூட்டி, மோகன்லால், மீரா ஜாஸ்மின் உள்ளிட்ட பிரபல நடிகர் நடிகைகள் பங்கேற்க ஒப்புக் கொண்டனர். இதற்கான விளம்பரம் மற்றும் ஒத்திகையில் மீரா ஜாஸ்மின் கலந்து கொண்டார். ஆனால் நிகழ்ச்சி நாளன்று முன்னணி நடிகர், நடிகைகள் எல்லாம் குறித்த நேரத்தில் மேடைக்கு வந்த நிலையில் மீரா ஜாஸ்மின் மட்டும் தாமதமாக வந்ததாக கூறப்படுகிறது.

இதனால் மற்ற நட்சத்திரங்களுக்கு தர்மசங்கடம் ஏற்பட்டது. இதையடுத்து மீரா நடனத்துக்கு அனுமதி மறுக்கப்பட்டது. இதுகுறித்து குழுவை சேர்ந்த பிரதிநிதி ஒருவர் கூறும்போது, ‘‘நட்சத்திர கலை நிகழ்ச்சி என்பது ஒரு கூட்டு முயற்சி. ஒருவரின் ஒத்துழைப்பு இல்லாவிட்டாலும் குழப்பம் ஏற்படும். பல நாட்கள் ஒத்திகைக்கே மீரா தாமதமாக வந்தார். சில நாட்கள் வரவே இல்லை. நிகழ்ச்சி நாளன்றும் லேட்டாக வந்ததால் அவர் இல்லாமல் நிகழ்ச்சி நடத்தப்பட்டது’’ என்றார். ஆனால், சங்க செயலாளரோ, ‘‘உடல் நலம் சரி இல்லாததால் நிகழ்ச்சிக்கு வர முடியாது என்று மீரா கூறிவிட்டார்’’ என்றார்.