ரகுமான் இசையில் ரஜினி பாடிய இந்தி பாடல்

தந்தை, மகனாக ரஜினி டபுள் ஆக்ஷனில் நடிக்கும் படம் ‘கோச்சடையான்‘. மகள் சவுந்தர்யா இயக்குகிறார். தீபிகா படுகோன், சரத்குமார், ஆதி உள்ளிட்ட பலர் நடித்துள்ளனர். ஏ.ஆர்.ரகுமான் இசை அமைக்கிறார். மோஷன் கேப்சர் என்ற புதுவித தொழில்நுட்பத்தில் உருவாகும் இப்படத்தின் பெரும்பாலான பணிகள் முடிந்துவிட்டன. ரஜினியும் டப்பிங் பேசி முடித்திருக்கிறார். இந்நிலையில் இதன் இந்தி பதிப்பிற்கு முதன்முறையாக ரஜினி சொந்த குரலில் பாடிய பாடல் பதிவு செய்யப்பட்டது. இருவேடங்களை ஏற்கும் ரஜினி கோச்சடையான் என்ற பெயரில் தத்துவவாதியாக ஒரு கதாபாத்திரத்தில் தோன்றுகிறார்.

தமிழில் வைரமுத்து எழுதிய பாடல் இந்திக்காக மொழிமாற்றம் செய்யப்பட்டது. இர்ஷத் கமில் இந்தியில் மொழி மாற்றம் செய்தார். ரஜினியின் தத்துவபாடலாக இது அமைந்திருக்கிறது. ‘மண்ணின் மீது மனிதனுக்கு ஆசை மனிதன் மீது மண்ணுக்கு ஆசை மண்தான் கடைசியில் வெல்கிறது. மனம்தான் உணர மறுக்கிறது‘ என்ற வரிகள்போல் தத்துவார்த்தமான வார்த்தைகள் இப்பாடலில் இடம் பெற்றிருக்கிறது. ஏ.ஆர்.ரகுமான் இசையில் சமீபத்தில் இப்பாடலை ரஜினி பாடினார். இந்தியில் இவர் பாடும் முதல் பாடல் இதுதான். தமிழில் ஏற்கனவே ரஜினி ‘மன்னன்‘ படத்திற்காக ‘அடிக்குது குளிரு‘ என்ற பாடல் பாடி இருக்கிறார்.